Shillong, Jymmang 22: Ka sor Shillong bad ki Shnong kiba marjan kin mad ia ka jingkyrduh um kaba 6 kynta ha ka 25 tarik u Jymmang, namar ka jingpyniaid shakhmat ia ki kam pyntrei hapoh jongka Greater Shillong Water Supply Scheme.
Katkum ka notis kaba la pynmih da u Chief Engineer ka Public Health Engineering (PHE) la ong ba kane ka jingkhang ban sam ia ka umbam umdih kan treikam naduh ka por 10 baje mynstep haduh 4 baje janmiet.
Kane ka jingbym ai ia kum kadei namar ka jingsdang thymmai ia ka 6.6 KV High Tension Panels na ka bynta ban bujli thymmai ia ki kor bad ki mashin jong ka Greater Shillong Water Supply Scheme.
“Ha katei ka por, kan ym don kano kano ka jingsam ia ka umbam umdih ha sor Shillong bad ha ki shnong kiba marjan” la pynpaw ha ka notis.
Ka tnad PHE kala pynpaw ruh ba kan pyrshang lut katba lah, ban ialeh ban pyndep kloi khnang ban ioh sam ia ka um sha ki paitbah tang mar ia dep katei ka kam ban shna.
Ka tnad kala kyntu ruh ia ki paitbah ba kin ym sngeweiei hynrei ba kin long kiba iai shah shipor bad kane ka jingpynbna.
La bthah ia ki nongshong shnong ba ki pynlang lypa ia ka um bad kin pyndap pynbiang ia ki jingdonkam ki jongki ha ka por ba trei katei ka kynta jong ka jingkhang ban sam ia ka umbam umdih.
