Shillong, Jymmang 22 : U Myntri Rangbah ka Jylla Conrad K Sangma ha ka sngi Thohdieng, ula buh ia u mawnongrim jong ki prokram kam pynroi sor ba kot palat T.150 klur ha Tura, haba ban jur ba ka synshar khadar ka dei ban long kaba buh hakhmat eh ia u paidbah bad suhthied ha ki jingiakren ba iai bteng bad ki nongshongshnong.
Laid the foundation for over ₹150 Crore worth of transformational urban development projects for Tura town.
These projects include the redevelopment of Najing Bazar into a modern commercial hub with improved market spaces, parking, hotel facilities, and dedicated vendor… pic.twitter.com/6LdSkYZfxT
— Conrad K Sangma (@SangmaConrad) May 22, 2026
Ki project ki kynthup ia ka jingpyntrei pynthymmai ia ka Najing Bazaar ba T.60.76 klur ba don bad ka jaka pynieng kali, ka hotel, ka jaka shong dukan madan bad ka jaka bam ba ngiam 500 ngut, ka jaka pynieng kali ba bun kyrdan (multi level car parking ) ba T. 51.21 klur bad ka cineme complex ha Dakopgre lem bad ka jaka ban pynieng 200 tylli ki kali, ka cinema ba don lai tylli ki screen, ka jaka ialehkai bad jaka bam, ka jingpynbha ia ka SMELC building ka ban don ia ka lynti iaid kjat ba don da ki dur mattithaw bad deiriti, ka museum, ka park ki khynnah, ka CM Youth Centre bad ka jaka ki riew tynmen.
Haba ai jingkren, u Myntri Rangbah Conrad K Sangma ula ong ba ka synshar khadar ka dei ban iai long beit kaba buh hakhmat ia u paidbah bad kaba pynshong nongrim na ki jingiakren ba khlem sangeh bad ki nongshongshnong.
“Ka CM Connect ka dei ka buit bala wanrah halor kane ka jingthmu- ba man ki nongshongshnong ki dei ban ioh ka lad ban iakren beit beit bad ka Sorkar” ong u CM ha ka jingialang kaba la wan iashimbynta da u CEM ka GHADC, ki MDC, u Chairman ka Tura Municipal Board, ki Heh Ophisar, ki barikor bad ki nongshongshnong.
Haba batai ia ka CM Connect 1971 helpline, ula ong “Man ki jingsngewkhia bala pynsngew da ki nongshongshnong la buh jingthoh ha ka system bad la phah pat sha ki Ophisar ba dei khmih ba kin leh eiei. Ia kine ki jingeh la khmih lynti ba kin pyndep hapoh ka por kaba la buh bad ia kine ki kam baroh la khmih hi da ma nga hapoh ka por kaba biang”.
U Conrad ula pynbna ba ka Sorkar kan sa buh ia ki CM Connect Office ha baroh ki 56 tylli ki Block ban pynduna ia ka jing leit jingwan sha ki district headquarter. “Ki paidbah kim donkam ban hap leit shaduh ki district headquarter namar ki jingshakri kiba donkam” ula ong.
Halor ka jingpynkylla dur ia ka Tura, ula pynpaw “‘Ha kine ki phra snem, ka Sorkar kala wanrah ia ki skhim bapher bapher ban pynitynnad ia ka sor Tura. Ngi dang don ha ka lynti kaba jngai ban iaid hynrei lyngba da ki jingpyrshang ba iai neh, ka Sorkar kan iai bteng ban pynbha ia ki jingdon jingem bad kynshew ha ki jingtei.
Haba batai bniah halor ka project Najing Bazaar, ula ong ba kane kan kynthup ia ka jaka pynieng kali ba ngiam 40 tylli ki trok bad 50 tylli ki kali, ka hotel ba 70 jingthiah bad 200 tylli ki dukan ba marjan.
U Myntri Rangbah ula pynlait ruh ia ka Tura Municipal Board Mobile App, sam ia ki cheque sha ki barikor hapoh ka Chief Ministers Artist Engagement Scheme, bad pynbna ban pyndait ia 552 tylli ki LED streetlight bad 500 tylli ki CCTV camera ha kylleng ka sor Tura.
“Ngi la pynlait ia ka skhim kaba aikam beit beit ia ki barikor trai jylla-ban pynkylla ia ki jaka paidbah kiba itynnad lyngba ki murals, ka jingthoh dur bad ki jingdro ba bun jait” ula ong haba bynrap “Kane kan plie ia ka lad kamai kajih, pynsngew sarong ia la ka jong ka sor bad ka jingiohi ia ka jingitynnad ki jaka sor”.
Halor ka jingkhuid, ula ong ba ka rukom aikyrdan ia ki shnong ki thaw kan “pynlong dustur ban leh khuid hapdeng ki nongshongshnong ha kaba jaka ka jingpynkhuid ba shisien shisnem” ong u CM
Haba pyniasnoh ia ki project sha ka 39th National Games 2027, ula ong “Ki jingtei kiba bha, ki lynti iaid kiba khuid, ki jingpynwandur kaba la pynlong da ka jingithuh ia ka kolshor kan batai ia ka jingshem jong ki nongwankai ha ka por ba don kane ka lympung bad kumjuh ruh hadien habud”.
“Khatduh, ka jingjop jong ka jingpynkylla dur ia ka sor yn sat hew daka jingshem ha ka rukom im, pynthikna ia ka jingshngain ia ki longiing longsem, ka burom naka bynta ki nongshong dukan madan, ka kabu na ka bynta ki samla bad ka jingkitkhlieh lang ha kaban pynneh ia ka jingkhuid bad ka sor kaba treikam” ong u Myntri Rangbah.
Ia kane ka prokram la pynkut da ka jingialang jong ka CM Connect ha kaba ki nongshongshnong kila pynsngew ia ki jingeh beit beit hakhmat u Myntri Rangbah bad ki Ophisar.
