Itanagar, May 22: Ki pulit jong ka jylla Arunachal Pradesh ki la sdang ban pynlong ka jingkhynra kaba jur pyrshah ia ki nongpynkhein ia ka Inner Line Permit (ILP) bad haduh mynta ki la lap ia kiba bun ki riew shimet kiba pynkhein ia ka ILP.
Hadien ka jingiakhih jong ka ST Bachao Andolan ha Arunachal Pradesh, ka sorkar ka la sdang ban wad bniah ia ki nongpynkhein ia ka ILP.
Haba thoh ha X, u Myntri kam poh iing ka Arunachal Pradesh, u Mama Natung ha ka sngi Thohdieng u la thoh: “Ka jinglap ia ki 118 ngut ki nongpynkhein ia ka ILP ha ka them Lower Dibang ka pyni ia ka jinglong khia kaba ka @ArunachalPolice ka pyntreikam ia ki lad jingiada ain jong ka bad ban iada ia ka hok jong ki trai ri trai muluk jong ngi,”.
“Ka rukom ai Inner Line Permit kam dei kaba shu leh ryntih.Ka dei ka rukom ain kaba iada ia ka jinglong jong ka jylla jong ngi bad uwei pa uwei u briew uba nabar uba rung sha Arunachal Pradesh u dei ban burom bad bud ryntih ia ki kyndon jong ka ILP.Ki nonggpynkhein kin ngat ha ka jingpynshitom kaba tyngeh katkum ka ain,” la ong u Natung.
Shuh shuh u la bynrap, “Ha kajuh ka por, nga kwah ban pynkynmaw ia baroh ki nongpyntreikam, ki kontraktor bad ki agency ban pynthikna ia ka jingpynshisha bad jingthoh ia ki kot ki sla kiba biang jong ki nongtrei bym dei na ka thain shwa ban iateh kular.Ka jingburom ia ki ain jong ngi ka dei ka jingburom ia ka Arunachal Pradesh hi,”.
“La iohi ba la pynkhein ia ka ILP hadien ba ki kontraktor ki la wanrah ia ki nongtrei na kiwei pat ki jylla bad khlem kano kano ka ILP ne ki kot ki sla kiba biang ki nongtrei ki la rung sha Arunachal Pradesh na ka bynta ki kam shna ïing.Kham bunsien, u kontraktor u ai ia ki kot ki sla thok jong ki nongtrei na ka bynta ka jingrung jong ki sha Arunachal Pradesh na ka bynta ban trei.Hynrei dang shen shibun ki nongbylla na Assam la lap bad la khang pyrshah ia ki ban rung sha Arunachal Pradesh,” ong uwei u nongshong shnong.
Ka ILP kaba la ai katkum ka Bengal Eastern Frontier Regulation jong u snem 1873, ka dei ka kot leit jingleit kaba shipor ba kino kino ki nong India ki bym dei ki nongshong shnong ba pura ka jylla Arunachal Pradesh ki dei ban don bad ban pyni ha shwa ban rung sha kane ka jylla.
Ka Inner Line Permit (ILP) ka long kaba donkam na ka bynta ka Arunachal Pradesh nyngkong eh ban iada ia ka jinglong ryntih jong ki briew, ban iada ia ka hok khyndew jong ki riewlum trai ri, bad ban pynneh pynsah ia ka jinglong tynrai ba kyrpang jong ki na ka jingwan tuid palat ki briew kiba nabar.
Ka kynhun myntri jong ka Arunachal Pradesh, kaba la pyniaid da u myntri rangbah ka jylla u Pema Khandu, ka la mynjur ia ka rai ban pynlong ia ka Inner-Line Permit (ILP) kaba kham pyrkhing bad kaba ym dei ban shah khein sting.
Katei ka rai, ka long hadien ba la pynlong ia ka jingkhang dam ba 36 kynta ha ka step sngi Palei da ka Scheduled Tribe Bachao Andolan Committee, kaba dei ka seng trai shnong.
“Ka jingkhang dam kaba 36 kynta ka la ktah ia ka jingim kaba man ka sngi ha Arunachal Pradesh.Hadien kata ka sorkar ka la leit ban pyntreikam kham pyrkhing ia ka ILP.Ka ILP ka long kum ka atiar na ka bynta jong ngi, ka ban iada ia ka hok jong ngi,” la ong u nongshong shnong.
 bad haduh mynta ki la lap ia kiba bun ki riew shimet kiba pynkhein ia ka ILP.){kind=link}