Shillong, Jymmang 21: U Symbud Myntri Rangbah ka Jylla bad MLA bala saw samoi lynter ka Nartiang Bah Sniawbhalang Dhar ula kynthoh ia ka jingpynsngew u President ka VPP Ardent M Basaiawmoit ba u lah ban iakhun noh ia ka elekshon MLA 2028 na Nartiang Constituency da kaba ong “Mano mano ruh ki don ia ka hok ban iakhun ia ka elekshon na kano kano ka jaka bad ngam dei satia u trai ka Nartiang constituency”.
“Ynda la wan ka elekshon 2028, balei ngin hap ban da khot sngewbha ia ki briew? Baroh ki long laitluid ban iakhun” ong u Bah Dhar haba jubab sha ki nongthoh khubor halor ka jingpynpaw u Bah Ardent.
“U Bah Sniawbhalang un iakhun, ka UDP kan iakhun, ka BJP ruh kan iakhun, ka VPP ruh kan iakhun. Hynrei ngan ong tang kawei- ha ka constituency jong nga, mano manor uh ki lah ban iakhun…ngam lah ban khang ia ki” ula ong.
“Nga dei tang u MLA ka Nartiang constituency, ngam dei u trai jong ka constituency namar kata baroh ki don hok ban wan iakhun elekshon napoh ka constituency ba nga mihkhmat” ula ong.
Haba kylli la ka jingiatreilang ka NPP bad ka BJP kan ktah ia ka lad ban jop ha u 2028, u Bah Dhar ula ong ba ki nong thep vote kin jied kat kum ka jingtreikam.
“Phi iohi, kam don satia ka jingtynjuh ha u 2028. Ki paidbah ka Jylla ki tip iano ban vote bad iano ban nym ai vote” ula ong.
Ula pynksan ba ka jingiatreilang bad ka BJP kala ai jingmyntoi bha ia ka Jylla.”Watla ngi iatreilang bad ka BJP, hynrei ki nongrim treikam ki paher…bad hooid ngin ioh ruh ia ki kam pynroi na ka Sorkar Pdeng” ula ong.
U President ka VPP dang shen ula pynpaw ba ka VPP ka lah ban pynieng ia u na Nartiang ha u 2028.
