Tura, Jymmang 21: U Myntri Rangbah ka Jylla Conrad K. Sangma ha ka sngi Palei, ula lum ia ka jingialang jong ki Pulit, ka Urban Affairs bad ka Tnad Veterinary ban sdang ia ka sienjam ban tei ia ka Modern Police Complex ha Rongkhon, West Garo Hills, ka project kaba don ia ka jingthmu ban pynkhlain ia ki jingtei ha sor bad ban pynduna ia ka jingkhapngiah ha ka sor Tura.
Ia kane ka jingialang la pynlong ha Tree House ha Tura, ha kaba la iatai ia ka jingpynwandur ban tei ia ki jingtei jong ki pulit ha Rongkhon da kaba pynkynriah noh ia ki jingtei ki jongki kiba la don lypa ha ka jaka kaba dap paitbah hapoh ka Tura Bazar.
Ki ophisar kila ong, ba katei ka jingtyrwa ia ki jingtei kadei kaba la khmih lynti ban pynduna ia ka jingkhapngiah ia ka sor Tura bad ban thaw ia ki lad ban shna ia ki jaka paitbah kiba jyrngam, ki projek ban pynitynnad bad ban pynbha ia ki jaka paitbah hapdeng jong ka sor Tura.
Ha katei ka jingialang, u Myntri Rangbah ula banjur ban wanrah ia ki jingtei kiba biang kiban iahap lang bad ka jingpyniar ia ki jingtei bad ka jingpynneh pynsah ia ka mariang bad ka jingbit jingbiang jong ki paitbah.
Ula ong, ba ka projek kan iaid ryngkat lang bad ka jingiohi jngai jong ka sorkar ban pynkylla dur ia ka Tura sha kaba khuid, jyrngam bad kaba la pynwandur bha kum ka pdeng sor.
Ka jingtei pynbha biang ia ka thain Tura Bazar kadei kaba la khmih lynti ba kan plie lad ia ki jaka kiba idei bad ki briew, ki jaka kiba pynwandur itynnad bad ki jaka kiba jyrngam kiban iadei bad ki briew kiba shong basah bad kiba wankai.
Ki Ophisar na ki tnad bapher bapher kila iatai sani halor ka jingdonkam ia ki jaka, ki bynta jong ka jingiatreilang, ka rukom pynwandur pynwandar bad ka jingpyntrei ha ki wat ban pynthikna ba ka jingpyntrei ia ki projek kaban long kaba iaid ryntih.
Ka jingtyrwa ban tei ia ka Police Complex kadei kaba la khmih lynti ban kyntiew ban ai ka jingshakri ki bor sorkar bad ban pynbiang ban kyntiew ia ki jingtei bad ki lad jongka jingai jingshakri ia ki pulit.
Ka Sorkar Meghalaya ka iengskhem ha kaban wanrah ia ki kam pynroi kiba iaineh ha sor bad ka rukom pynwandur kaba pynleit jingmut na ka bynta ki paitbah bad da kaba pynleit jingmut ha kaban kyntiew ia ki jingtei na ka bynta ki paitbah, ban kyntiew ia ka rukom im bad ban pynneh pynsah ia ka mariang wat hapdeng ka jingroi jong ki jaka ha sor.
