Shillong, Jymmang 21 : Haba kyntait ia ki jingkynnoh ba pyndonkam da ka bor, u Symbud Myntri Rangbah ba khmih ia ka kam Pohiing, Bah Prestone Tynsong ha ka sngi Palei, ula ong ba ka Sorkar kam don eiei ban buhrieh bad bthah ia ki kynhun ba pyrshha ia ka karkhana dewbilat ba kin pynsngew ia ki jingpyrshah jong ki ha ka public hearing kaba la buh ban long ha ka 22 tarik Jymmang.
‘Sngewbha, kim dei ban sngewthuh bakla ba ka Sorkar kala leh da ka bor. Kaei kaba phi mut ban ong ba ngi la leh da ka bor?. Lada ngi la leh da ka bor, kan ym don satia wat ka public hearing. Ki kam kin jin da la iaid beit shakhmat” ong u Bah Prestone haba jubab ia ki jingkylli ba iadei bad ka jingiakhih pyrshah ia ka public hearing jong ka Shree Cement.
Ula ieng skhem ba ka jingpyrshah ia ka hearing dalade kala shah jop ia ka jingthmu jong ka jingiasyllok paidbah.
“Ngi long kiba kloi ban iakren. Haba don kano kano ka jingsngewthuh bakla, ngi don beit hangne ban pynbeit ia ki jingeh. Hynrei mynta kito ki briew kiba pyrshah ia ka public hearing, nga tharai ka long kaba bakla. Kila leh bakla” ula ong.
Haba batai ia ka jingthmu, u Bah Prestone ula ong “Haba ngi ong public hearing, ka dei kaei?, Ka dei kaba la pynlong ban tip ia ka jingmut jong ki paidbah, ki kynhun ba don bynta, la ki kwah ne em ban don ia ka karkhana dewbilat. Kane ka long kaba shai?”.
U bynrap ba ka kyndon ka bthah ia ka Meghalaya State Pollution Control Board ba kan pynlong ia ka hearing.
“Kumta lada phi pyrshah ia ka, leit sha ka hearing. Ka kyndon jong ka ain ka kren shai ba ka Pollution Control Board ka hap pynlong ia ka public hearing” ula ong.
U Bah Prestone ula buh jingkylli ruh ia ka jingiakhih shabar jong ka public hearing. “Ngam sngewthuh balei ba ki leit iakhih ha Ophis u DC lane kiwei ki jaka. Balei ba kim leit sha ka hearing? Haba phi don ka jingsngewkhia, leit sha katei ka jaka. Ngi iatreikam haba shai bha” ula ong.
“Nga kyrpad ia kito kiba iakhih, sngewbha wat ym sngewthuh bakla, Sngewbha sngewthuh ia kiei kiba donkam ban leh bad leit sha ka public hearing bad pynsngew ia ki jingpyrshah jong phi hangtei ha ka public hearing” ula ong.
