Shillong, Jymmang 21 : Ha ka jingiakhun ban ioh ia u “MP ka Sorkar” ha Delhi, u National Vice President ka NPP bad Symbud Myntri Rangbah ka Jylla Bah Sniawbhalang Dhar ha ka sngi Balang ula ong ba u Dr DRL Nonglait un dei ‘ka sur jong ki paid ka ri-lum Khasi-Jaintia ha Delhi” lada u shah jied ha kane ka elekshon shiteng samoi ban wan jong ka Shillong Lok Sabha.
Haba kren ha ka rynsan ialap elekshon ha Nongpoh, u Bah Sniawbha ula ong ba ki khubor ba ioh na ri-lum Jaintia ki long kiba sngewtynnad bha bad ki briew ki ai ka jingkyrshan ia u kyrtong ka NPP. “Nga la iohsnew na baroh ki 7 tylli ki constituency ka ri-lum Jaintia, Nga la iohi ba baroh kila ong ba mynta ki dei ban kyrshan noh ia u Dr DRL Nonglait. Balei? Namar u Dr Nonglait u dei u briew ba don ka nongrim, u bym ju kren pathar katba lap ba shem” ula ong.
U Bah Sniawbha ula ong ba ka ri-lum Jaintia ka don “palat 3 lak ki vote” bad ka party kan trei shitom ban ioh ia ka jingjop ba don burom, hynrei ula bynta ba “tang ka Jaintia kam pat biang stia” haba kyntu ia ka Ri-Bhoi bad West Khasi Hills ruh ban kyrshan ia u Dr Nonglait, haba kdew ia ki khubor ba u ioh lum ba “I kumba 85% na ki vote kan leit sha u Dr Nonglait namar ba u dei na katei ka thain”.
“Nga ai ia ka jingkular na ka liang ka party ba ngin trei miet la bad sngi, ngin ym thiah shuh, khnang ba ngin ioh ia ka jing jop bad pyndep ia baroh ki kam kiba sah bad ka Sorkar pdeng” ong u Bah Sniawbha.
Ula pynpaw ba ka NPP ka khmih lynti ba u Dr Nonglait un buddien ia ki jingdawa ba hakhmat eh jong ka Jylla ha Delhi.
“Lyngba u Dr Nonglait, ngi khmih lynti ba ki kam kiba ngi la angnud la slem bha, kum ka ILP, Nga ngeit ba u Dr Nonglait un buddien bad tynruh ia kane ka jingdawa namar baroh ki samla jong kane ka ri jong ngi ki kwah eh ia ka” ula ong.
Haba ban jur ia ka jingiatylli, u Bah Sniawbha ula ong “Nga iohi mynta ba ki samla ka Jylla ki donkam ia ka jingiatylli khang ba ngin lah ban wanrah ia ka roi ka par. Ka jingiatylli ka dei kaba kongsan bha khnang ban gin lah ban jam shakhmat bad kano kano ka mishon bad ki jingangnud jong ki Khun ka Jylla jong ngi, lem kumta ngin ym poi shano shano ruh”.
Ula bynrap ba “ka burom bad discipline” ka long kaba kongsan. “:ada ngim tip kumno ban burom iwei ia iwei, kumno ngin tei iala ka Jaidbynriew?. Lada ngim tip ia ka burom lane discipline, lane lada ngim nang ban pyniaid ialade, ka jylla jongngi kan poi sha khlaw”.
Haba thew sha kiwei pat ki seng sain pyrthei, ula ong “Ki don katto katne ki nongialam jong kiwei ki seng sain prthei: don kiba kren khlem ka jingtip, don kiba batai palat ia kaei kaba ki sngewthuh, don kiba shukor bad thok ia ki paidbah bad don ruh kiba iakhih hhynrei kim tip pat ia ka nongrim aiu ba ki iakhih”.
“Lada ki nongialam jong ngi ki dei ki briew kiba ialam bakla ia u paidbah, ka Jylla jong ngi kan poi sha khlaw ha ki sngi ban sa wan” ula maham haba kyntait ruh ia ki jingkynnoh ba leh shiliang haba phai sha ki kam pynroi.
“Nga ju iohsngewbha bad iohi ha Youtube, ki ong ba ka NPP ka leh shiliang, ba ka ai ia ki kam pynroi tang ha ki constituency ba ka don MLA, hynrei nga ong em, kane ka long kaba bakla. Kane ka jaka kaba ngi ieng mynta, kane ka surok kaba dang shu dep shna ba shongdor palat T. 60 klur, kynmaw paidbah, kane ka constituency ka dei kaba mihkhmat da u MLA ka UDP ym ka NPP”.
U Bah Sniawbha ula ong ba ka jingiakhih ha surok kam dei sati aka bynta jong ki Nongmihkhmat paidbah. “Lada ngi, ki nongialam jong phi, ngi lum ia ki paidbah ban ialam ia ki sha Secretariat, ngim pat biang satia ban long ki nongialam ne riewsain pyrthei. Balei ba ki paidbah ki jied ia ngi? Ka dei ban gin kren ha ka Iingdorbar, ban thaw ia ki ain, ban pynsngew ia ki jingeh kiba donkam ban kren”.
Haba kren halor ki project, ula iathuh ba shen ka Sorkar kan sab uh ia u maw nongrim jong ka surok Umsning-Jaggi Road kaba shongdor haduh T.240 klur.
Ula kdew ruh iaka surok UG bala dep pyndep ha ka jinglut ba jan kot T. 100 klur, ka surok Mairang-Assam kaba shongdor T,230 klur-ka project ba heh duh na ka special scheme, bad ka surok Lailad-Umling-Patharkhmat kaba shongdor T. 70 klur.
Haba iada ia ka jingshim ram ka Jylla, ula ong “Kano kano ka ram ba shim da ka Sorkar ka dei kaba don da ka ain bad ki rule bala buh da ka Sorkar Pdeng. Kam mut ba ka Sorkar ka lah ban shim ram kat kaba ka mon….Ka Sorkar ka dei jong u paidbah…wat shi naia ka pisa ka dei kaba kordor bha namar ka dei ka pisa u paidbah”.
Ula ong ba ka mang tyngka jong ka Jylla kala kiew “na ka T.9000 klur” ha u snem 2018 sha ka “tam ia ka T.30,000 klur” mynta. “Haba ka mang tyngka ka kiew, ka mut ba ka ioh ka kot bad ka bha ka miat jong ki nongshongshnong ruh ka kiew” ong u Bah Sniawbha.
U Bah Sniawbha ula iaroh ia u Myntri Rangbah Conrad K Sangma bad ong “U Myntri Rangbah, watla u wan na ka Jylla kaba rit, u dei u Myntri Rangbah uba iada ia ki Khristan. Mynta baroh ki phaikhmat sha u. Lada don kino kino ki jingeh jong ki Khristan ha Meghalaya, ha ka thain Shatei Lam MIhngi, u dei uba nyngkong eh u ban tieed ia ka jingkhang jong ka Sorkar India”.
