Imphal, Jymmang 20: Ka kynhun ki kynthei Naga ha ka sngi Balang ki la pynlong ïa ki jingïakhih ha kylleng ki distrik ba shong ki Naga ha Manipur, haba dawa ban pyllait suk ïa ki 6 ngut ki shynrang Naga kiba dang don ha ka kti ki nong rahbor, kaba la jia ha Kangpokpi district.
La pynlong ia ka jingiakhih shong kyllain mungor ha Tribal Market kaba don ha New Checkon, Imphal East, da ka Naga Women Union, katba kum kane kajuh ka jingiakhih, la ioh jingtip na Senapati, Noney, Ukhrul, Kamjong, Churachandpur, Chandel bad Tamenglong District.
Ia kane ka jingiakhih la ialam da ki Naga Women Organisation (seng kynthei Naga), ba kynthup ia ka Tangkhul Shanao Long, kaba la dawa ruh ban hiar shuki noh ia u Nemcha Kipgen, myntri rangbah ka Manipur, da kaba kynnoh ba ka seng jong u, ka donkti ha kaba rahbor ia kitei ki shynrang Naga.
La iathuh ba kitei ki jingshah rahbor ki la jia hadien ba la don ka jingshah ambush ha Kotlen ha ka district Kangpokpi ha kaba lai ngut ki nongialam balang Thadou ki la iap.
Ki tyllong khubor ki iathuh ba kumba 20 ngut ki Naga ki la shah rahbor hadien katei ka jingjia.Katba 14 ngut ki la pyllait naduh katei ka por, hynrei 6 ngut ki dang jah rngai.
Ki nongïakhih ki la rah ïa ki placard kiba thoh “Human lives, not hostages”, “Bring our people home alive”, “Bring back six hostages safe” and “Don’t test our patience”.
Ki kynthei kiba bun ki la ïashim bynta ha ki jingïakhih, da kaba pynpaw ïa ka jingbitar halor ka jingbteng ban rahbor ïa ki hynriew ngut ki shynrang haduh shi taiew hadien katei ka jingjia.
“Ïa ki shynrang Naga la rah na kawei ka jaka jong ki Kuki da ki briew jong ki hii.Balei ki bor pahara kim lah ban tohkit ïa ki nongshong shnong jong ka shnong Leilon Vaiphei kum shi bynta ban pynthikna ban pyllait noh ïa ki?” la ong u nongiakhih.
