Shillong, Jymmang 18: Ka Bharatiya Janata Party (BJP) Meghalaya kala dep jied ia ka kyrteng jong ki 4 ngut kiba kwah ban iakhun ia ka elekshon shiteng samoi jongka MP Lok Sabha hynrei ia ka rai kaba khatduh la khmih lynti ban shim ha ka jingialang jong ka seng kaban long ha ka 20 tarik u Jymmang.
Ia kane la pyntip, hynne ka sngi Nyngkong da u Nongialam ka BJP uba long ruh u MLA ka Pynthorumkhrah u Bah AL Hek uba la ong, “Ngi lah dep ban iakren halor ki 4 tylli ki kyrteng na ka bynta ka elekshon shiteng samoi jong ka Lok Sabha”.
“Ngin sa don ia ka jingialang ha ka 20 tarik u Jymmang. Hadien katei ka jingialang, ngin sa lah ban rai ne ban iatai halor uno uno u kyrtong uba biang na ka bynta ka seng”.
Ula kyntait ban iathuh ia ka kyrteng jong kitei ki kyrtong namar ba kadei ka rukom treikam jong ka seng.
“Tad haduh ban da lah pynbna, ngi lah don 4 tylli ki kyrteng tangba ngin ym batai ia ka kyrteng ka jongki” ong u Bah Hek bad ka bynrap, “Ngi don 4 ngut ki kyrtong kiba don ia ka jingthrang ban iakhun ia ka elekshon shiteng samoi jongka MP Lok Sabha”.
Haba kylli, la ka kyrteng jong u Myntri Sorkar u Bah Sanbor Shullai bad u IPS ophisar barim ka jylla u M Kharkrang kidei ki kyrteng kiba thrang ban iakhun ia ka elekshon, u Bah Hek ula jubab da kaba ong, “Ngan ym batai eiei ia ki kyrteng hynrei kila don pat 4 tylli ki kyrteng. Tad ynda haba ka seng ka lah iakren. Ngam lah ban iathuh eiei ia phi namar ba kane kadei ka kam shimet hapoh jong ka seng kumba ka long ia mynta hi. Shisien ba ngi lah dep ban jied bniah ia u kyrtong. Ngin sa ai ia ka jingpynbna”.
U Bah Hek ula pynthikna ba ka seng BJP kan sa pynieng ia la u jong u kyrtong.
“Baroh ki seng sain pyrthei kin pynieng ia la ki kyrtong bad ka BJP ruh kan sa pynieng hi ia la u jong u kyrtong” ula ong.
Halor ka jingpynieng kyrtong ka NPP bad ka VPP, ula ong “Ki don ia la ka mat treikam. Man la ki seng sain pyrthei ki don ia la ki jong ki mat treikam. Ka BJP ruh kadei kaba don ia ka mat treikam kaba khlain bha bad phin sa tip ynda lah poi ka por, shisien ba ngi lah pynbna ia u kyrtong”.
Haba pynpaw ia ka jingskhem jingmut ia ka jinglong jingman ka seng, u Bah Hek ula ong, “Hooid, ngi don 100% ia ka kabu ban jop ia ka elekshon na Shillong Seat.”
Ula kam ba ka BJP kala nang kiew ha ka jingioh ia ka jingkyrshan ha kylleng ki bynta jong ka jylla. “Ki briew na kylleng ki bynta jong ka jylla kila wan ban pyniasoh bad ka BJP. Wat ki MLA kiba mynta bad ki MLA kiba rim kila wan ban iakynduh shimet ia nga bad pynpaw ba ki kwah ban pyniasoh noh bad ka BJP” ula ong.
“Kumta ka jingpdiang ia ka BJP hapoh ka jylla Meghalaya kala long kaba jur bha”.
Haba kylli ban ai ia ka kyrteng jong ki nongthaw ain, u Bah Hek ula kyntait ban iathuh da kaba ong, ba ka don ka ain kaba tehlakam ia ki nongthaw aiñ ban ryngkang diengkper. “Tad haduh ba kin da wan ban pyniasoh, kam long kaba bha ban jer ia ka kyrteng jongno jongno ruh” ula ong.
Haba kylli la ka kyrteng jongu Myntri Rangbah barim ka jylla u Mukul Sangma ka don napdeng ka kyrteng jong kita kiba don jingthmu ban pyniasoh bad ka BJP, u Bah Hek ula ong, “Ngan ym jer kyrteng eiei hynrei ngan ong pat ia phi ba ki don bun bha. Ym tang napoh ka rilum Khasi-Jaintia Hills hynrei wat na rilum Garo ruh, kila wan ban iakynduh ia nga shimet naba ki kwah ban rung noh sha ka seng BJP. Ngin pdiang sngewbha ia ki tangba ha ka por kaba dei pat”.
Ka Tarik ban pynlong ia ka elekshon shiteng samoi jonga ka MP Lok Sabha ha Shillong, kadei kaba ka Election Commission of India kam pat shim la pynbna haduh mynta.
 Meghalaya kala dep jied ia ka kyrteng jong ki 4 ngut kiba kwah ban iakhun ia ka elekshon shiteng samoi jongka MP Lok Sabha hynrei ia ka rai kaba khatduh la khmih lynti ban shim ha ka jingialang jong ka seng kaban long ha ka 20 tarik u Jymmang.){kind=link}