Imphal, Jymmang 16: Hapdeng ka jingkiew jong ka jingïakynad ha Manipur hadien ka jingshah pynïap jong ki lai ngut ki nongïalam balang, katto katne ki seng bhalang kila buh ïa ki jingdawa kiba bun jait ban pan jingïada ïa ki jaitbynriew riewlum bad ki nongïalam niam.
Da ki spah ngut ki briew jong ka Kuki-Zo, ha ka sngi Thohdieng, kila ai burom khadduh ïa kitei ki nongïalam balang, kiba la shah pynïap, ha kaba la tep ïa ka met jong ki, ha madan Brigadier M. Thomas ha Kangpokpi district.
Ki sengbhalang kila dawa ïa ka jingtohkit jong ka National Investigation Agency (NIA) halor ki kam pynïap briew, ban lap mardor bad pynngat ha ki kyndon aiñ ïa baroh ki nongleh kam sniew bad ki nongthmu, bad ban buh ïa ki lad pahara ba neh na ka bynta ki riew paidbah bad ki nongïalam niam ha ki jaka ba don jingma.
Napdeng ki jingdawa ba kongsan ki long ka jingbuh ia ki jaka pahara ba kyrpang, ka jingpynkloi ia ka jingiatreilang ha ka sain pyrthei bad ka kynhun Suspension of Operations (SoO), ka jingithuh paidbah ia ka jingkynnoh ba la pynshitom bein ia ki jaitbynriew riewlum bad ka jingsynshar ba kyrpang na ka bynta ki riewlum ha Manipur.
Kitei kiba la khlad noh ki dei kiba la tip kyrteng kum u Reverend Vumthang Sitlhou uba dei u general secretary barim ka Manipur Baptist Convention uba dei u nongshong shnong jong ka shnong Taloulong kaba don ha Kangpokpi district.
U Reverend Kaigoulun Lhouvum na Keithelmanbi Military Colony, Kangpokpi, bad u Pastor Paogoulen Sitlhou, uba dei ruh na Keithelmanbi Military Colony.
Ha kajuh ka por, ki sengbhalang jong ki Naga, kynthup ïa ka All Naga Students’ Association Manipur (ANSAM), kila buh ruh ïa ki jingdawa hadien ka jingïap jong u Wilson Thanga, uba la shah pynïap ha ka jingshah thombor ha Noney district ha kane ka juh ka sngi.
Ki seng kila dawa ban leh da kaba tyngeh pyrshah ïa kito kiba donkti bad kila ong, ba yn nym kam ïa ka met jong u nongïap tad haduh ba ka sorkar kan ai ka jingkular kaba skhem ba yn ithuh bad kem ïa ki nongthombor.
