Shillong, Jymmang 15 : U Secretary ka Ministry of DoNER Sanjay Jaju, ula ong ba ka Meghalaya ka dei ka Jylla kaba kiew sted eh hapoh ka Ri haba phai sha ka ioh ka kot bad ka roi ka par haba kular ia ka jingkyrshan kaba khlem sangeh na ka Sorkar Pdeng ban pyntyllun shakhmat ia ka Jylla.
U Jaju ula pynpaw ia kane ha ka jingialang ba lyngkot (Curtain Raiser) bala long ha Meghalaya House, New Delhi, kum ka jingpynkhreh ia ka North East India Infrastructure Summit & Exhibition (NEEINFRA) 2026, ka ban sa long ha Shillong ha ka 11 bad 12 tarik u bnai Jylliew 2026.
“Ka Meghalaya ka dei ka Jylla kaba kiew sted eh hapoh ka Ri, da ka jingkiew kaba kot haduh 13-14% bad kumjuh ruh ka ioh ka kot kaba kiew haduh arshah hapoh ka san snem bala leit” ong u Sanjay Jaju haba ai jingiaroh ia ka jinglong nongialam jong u Myntri Rangbah ka Jylla Conrad K Sangma.
Haba shim ia ka thain Shatei Lam Mihngi kum ka “Ashtalakshmi”, u Jaju ula ong ba ka thain ka don hapdeng eh jong ka thong ka Ri ha ka liang ka roi ka par bad ong “Ka Meghalaya bad ka Shillong kin dei ki jaka kiban dang kiew ha ka liang ka jingdon ia ki jingtei, ka jingkynshew kam, ka kam jngohkai bad ka sengkam sengjam”.
Ha kane ka jingialang la iadonlang u Myntri Rangbah ka Jylla Conrad K Sangma kum u kongsan, u Avinash Joshi, IAS, Secretary ka Ministry of Food Processing Industries, ka Sorkar India, u Sanjay Goyal, IAS, Commissioner & Secretary ka Sorkar Meghalaya bad Chair, Organishing Committee, NEIINFRA, u Bajrang Lohia, President ka FINER nalor kiwei kiwei.
Kane ka summit, kaba la buh ban long ha Shillong ha ka 11 bad 12 tarik Jylliew, 2026, kan wanrah lang shi jaka ia san ngut ki Myntri ka Sorkar Pdeng, ki Myntri Rangbah na baroh ki Jylla ka thain Shatei Lam Mihngi, ki nongthaw policy, ki nongkynshew kam, ki nongpyntrei ia ki jingtei, ki Bank bad ki nongialam jong ki kompani ban iakren halor ki lad pyniasoh, ka jingkynshew paw bad ka jingkiew shaphrang jong ka thain.
Haba kren ha ka jingialang, u Conrad K Sangma, Myntri Rangbah ba don burom ka Meghalaya, ula ong ba ka ioh ka kot jong ka Meghalaya kala kiew arshah ha kine ki san snem bala leit noh, katba ka jingkynshew pisa kala kiew “saw shah haba nujor ia kaei kaba long naduh u snem 2018”.
Haba khot ia ka Meghalaya “kum kawei na kiba kiew sted bha ha ka ioh ka kot hapoh ka Ri”, ula ban jur ba ka Jylla kala “iai bteng ban kiew ha kajuh ka jingsted ha kine ki lai haduh saw snem bala leit” ia kaba u ong, ka long kaba donkam na ka bynta ka jingshaniah jong ki nongkynshew kam.
Ha kaba kren halor ka Meghalaya Industrial Promotion Policy, u Conrad u la ong ba ka Jylla ka la pynmih ïa ki “jingai bun ki jingmyntoi” na ka bynta ki nongkynshew kam. Ula ban jur ruh ïa ka rukom treikam kaba khlain ha ka liang ka seng kam seng jam ka Jylla, haba pynpaw ba ka jaka kala iai bteng ban ioh ia ka jingithuh halor ka jingdon ia ka “rukom treikam kaba biang palat na ka bynta ki nongsengkam hapdeng ki Jylla kiba rit”.
U Myntri Rangbah u la kren ruh shaphang ka rukom treikam ban pyniar ia ka lyngkha treikam ha ka IT ha Jylla, haba pynpaw ba ka IT park ba nyngkong ka Jylla ka dei kaba ka “dap sman” katba ka IT park ba-ar ka ban dang wan, kala sakhi ia ka jingkwah ban don bynta jong ki kompani kiba dei napoh ka Ri bad nabar ri ruh kumjuh.
Ula ong ba ka Meghalaya mynta kala iaid shaphang ban nang pyniar, da ka jingthmu ban tei shuh shuh ia ki jingtei jong ka IT ki ban plie kham bun ki lad ia ki samla.
Kiwei pat kiba la ai jingkren ki long u Avinash Joshi, IAS, Secretary, Ministry of Food Processing Industries , ka Sorkar India, u Sanjay Goyal, IAS, Commissioner & Secretary, ka Sorkar Meghalaya bad Chair, Organising Committee, NEIINFRA, bad u Bajrang Lohia, President, FINER.
