Shillong, Jymmang 15: Ka Synod Khasi Jaiñtia Pdeng ka pynpaw ka jingsngewsih halor ka jingshah pyniap jong ki 3 ngut ki Pastor hapoh ka Jylla Manipur bad ka la pynrem ruh ia kane ka jingjia kaba ka niew kum ka jingleh riewkhlaw haba bynrap ba ka jingleh donbor pyrshah ïa ki nongïalam niam ka dei ka jingthombor ïa ka imlang sahlang jong ki briew.”
Ha ka kyrwoh ka ka KJP kala ong “Ngi pynpaw ïa ka jingsngewkhia kaba jur halor ka jingshah pynïap ki mynsiem ba lui lui bad khamtam eh ka jing thombor kaba la shim noh ïa ka jingim jong ki 3 ngut ki Pastor, kata u Pastors Rev Vumthang Sitlhou, General Secretary barim ka Manipur Baptist Convention, Pastor V. Kaigoulun bas Pastor Paogoulen”.
Ka Synod ka la ong ba ka la kyndit ban ioh sngew ia kane ka khubor shah pyniap ki nongialam niam. “Haba ngi iohsngew ia ki kam shyrkhei ngi la sngew lyngngoh shibun eh halor katei ka jingjia namar ngim lah ban mutdur ba ki jingim jong ki nongialam niam kiba ieng na ka bynta ka jingsuk bad jingiatylli ruh kim shym la lait na kane ka kam thombor. Kum ka Synod ngi ieng lang ha kaba pynrem ia kum kine ki kam,” ong ka kyrwoh.
Haba shim ia kane ka kam thombor kum ka kam thombor ia ka imlang sahlang, ka la bynrap, “Ngi lah ban ong ba ka jingleh donbor ia ki shakri U Blei bad ia ka bha miat jong ki briew ka dei ka jingthombor ia ka imlang sahlang. Ngi pynrem jur ia kum kane ka jingleh riewkhlaw.”
Haba phah khubor sngewlem shaka iing ka sem ki lanot, ka Synod ka la ong, “Ha kum kine ki por bad ki kynta jong ka jingsngewsih, ngi ieng ryngkat bad kiba ha iing ha sem jong ki bad bad ka imlang sahlang jong ka Balang. Ngi don lang haka por ba sngewsih jong phi. Ha kajuh ka por ngi duwai ba U Blei uba donbor halor baroh, un phah ia U Mynsiem Bakhuid jong U ha kum kane ka por jong ka jingsngewsih kaba khraw.”
Ka kyrwoh ka la ban jur ba ym don shuh kano kano ka daw ban sait khuid ia kane ka kam thombor, “Ka long kaba shisha ban ong ba ym don ba lah ban mutdur, ne ka daw ban sait khuid halor kane ka kam thombor iaki shakri U Blei. To ngin ïohi ïa ki kti pynjem jong U Blei kiba pynrung ïa ka bor ban ym ailad ha ka jingtieng bad jingïapher, hynrei ban ïakynduh ïa ka jingshun da ka jingieid”.
Ka Synod ka duwai ruh ban ioh bor ban ialeh pyrshah ia ki jingsniew. “Ngi duwai ba U Blei un pynkhreh ïa phi baroh da ka bor ba kynja Blei khnang ba phin lah ban ïakhun pyrshah ïa ki bor jong ka jingsniew da ka jingngeit bad jingshlur, da ka jingieid bad jingsngewskhem ba ha kaba kut ka jingsuk bad jingkmen kan jop,”.
