Pan bor ki Pulit ban khlong ia ka met u samla ba shah bomiap ha Pynter | Shim jamin lypa u Rangbah Shnong bad dkhot VDP

Shillong, Jymmang 15: U Superintendent of Police (SP) East Khasi Hills Bah Vivek Syiem, ha ka sngi Thohdieng, ula pyntip ba ki Pulit kila pan bor naka Iingiskashari ban khlong biang iaka met ba sah jong u samla Trophimos Khongmawloh (27 snem) uba iap namar ka jingkynnoh bom dusmon u Rangbah bad ki dkhot ka Village Defence Party (VDP) ka shnong Pynter, East Khasi Hills.

Une u Heh Pulit u pyntip ba 11 ngut ki briew ba kynthup ia u Rangbah Shnong ka shnong Pynter bad VDP kila shim ia ka bah jamin lypa na ka Iingkashari District Council.

Haba kren shaki lad pathai khubor u Bah Vivek ula iathuh ba ki Pulit kila ioh pdiang iaka ejahar haka 5 tarik Jymmang halor ka jingshah bom iap u Trophimos Khongmawloh bad la register iaka case ha Pynursla Police Station.

U Bah Vivek ula iathuh ba katkum ka ejahar, ka jingjia kala jia haka 7 tarik Iaiong ha kaba ka kynnoh ba u lanot (Trophimos Khongmawloh) ula shah shoh ha ka kynhun u Rangbah Shnong ka shnong Pynter bad ki dkhot ka VDP.

“Hadien bala ioh pdiang iaka ejahar ngi la register iaka case ha Pynursla Police Station bad ka jingtohkit kala iaid shakhmat” ong u Bah Vivek.

U SP ula iathuh ba iaka tarik ban khlong biang iaka met ba sah jong u Trophimos Khongmawloh yn sa pynbeit da ka ophis u SDO (Civil) Pynursla bad yn pynlong ruh iaka Post Mortem haka juh ka por.

U SP ula iathuh ba hadien ba ioh pdiang iaka kaiphod post mortem ki Pulit kin sa lah ban rai, la kin iakhun ne em pyrshah iaka bahjamim jong ki 11 ngut kiba shah kynnoh donkti ban shoh ia u lanot.

Haba iadei bad ka jingkynnoh baki dkhot ka VDP ki shim iaka ain ha kti, u SP ula ong “Haka jingshisha ki VDP kila ioh jingbthah bad kila bam smai ruh ba kidei ban iatreilang lang bad ki Pulit ym ban shim iaka ain ha kti”.

“Kane kadei ka jingjia ba nyngkong ha kaba ki dkhot ka VDP ki khlem pyntip shaki Pulit bad la kynnoh ba kila shoh ia u lanot” ula ong.