Shillong, May 15: Ka Nongkseh SSCC kala pynrem ia ka Rangdajied United FC da 2-1 ha ka jingiakhun ha ka Group A jong ka 5th Meghalaya State League Quarterfinal kaba la long ha Madan MFA hynne ka sngi Thohdieng.
U Chesterpaul Lyngdoh ula thep kol ha ka minit kaba 22 bad u Aibiangmame Nongneng ula thep ia ka kol ha ka minit kaba 90’+4 ban pynthikna ia ka Nongkseh ban khur ia ka jingjop katba u Pasborlang Khonglikong ula thep ia ka shi kol na ka bynta ka Rangdajied ha ka minit kaba 71.
Ha kawei pat ka jingiakhun, ka Mawlai SC kaba la shah pynliem ha ka Shillong Lajong FC ha ka jingiakhun Final jong ka MSL kaba 4, hynne ka sngi ruh kine ki kynhun kila iakynduh biang bad ka Shillong Lajong kala pynrem ia ka Mawlai da 3-1.
U Deibormame Tongper ula thep ia ka kol ha ka 16 minit, u Riborlang L Lyngkhoi ula thep ha ka 34 minit bad u Wilbert Marbaniang ula thep kol ha ka 86 minit na ka bynta ka Lajong katba u Basuklang Bina ula thep ia ka kol ha ka 35 minit na ka bynta ka Mawlai.
U Chesterpaul ula thep ia ka kol ha ka kylla step hynrei ka Nongkseh kala pynlehnoh ei ia kiba bun tylli ki kabu kiba kala ioh ha kane ka jingiakhun. Ha kawei pat ka liang ka Rangdajied ruh ka la ioh bun tylli ki kabu ban pyniakhaid ha ka kylla step hynrei haba u Dawanpynbiang Biam ula ioh ia ka kabu kaba biang tam ula shut ia ka bol hynrei kala leit dei ia u diengkol bad mih noh shabar.
Ka RUFC, kaba la shah pynliem da 1-0 ha ka Lajong ha kine ki 2 sngi kiba la dep, ka la bteng ban ialehkai bha ha ka kylla miet. U Coach Aiborlang Khongjee ula pynmih bujli ia ki arngut ki nongialehkai ban pynkhlain ia ka kynhun.
Ka RUFC kala ioh ia ka kabu ban thep kol haba u Gideon Mukhim ula shut ia ka bol shapoh ka ‘Box’ hynrei u nongap kol ka Nongkseh u Daraplang Tlang ym shim la iohkem bha ia ka bol bad kala lait noh na ka kti jongu, kumta u Pasborlang ula ioh ban pyndei ia katei ka bol bad kala rung shapoh kol.
Ka Rangdajied kala leh bakla ha kaba ai bun tylli ki Frekick bad ka Nongkseh kala ioh ban thep ia ka kol lyngba u Aibiangmame uba la pyndei da ka khlieh ia ka bol bad kala rung shapoh kol ban tam biang sa shi kol bad ban jop ia kane ka jingiakhun.
Ha ka jingkhun ka baar, ka Lajong kala khur ia ka jingjop bad kamai 6 point bad don ha khlieh eh jong ka Group. U Deibormame ula ioh thep ia ka kol banyngkong hadien ba kala don ka jingbakla na ki nongialehkai shadien jong ka Mawlai bad u Riborlang ula ioh thep ia ka kol baar na ka bynta ka Lajong da kaba ieh shadien ia ki nongialehkai pyrshah.
Tang hadien shi minit, ka Mawlai kala ioh thep ia ka shi kol lyngba u Basuklang bad kane kala nang pynitynnad iaka rukom ialehkai bad kane kadei ka kol ka baar kaba ka Lajong kala shah thep ha ka MSL 5.
U Basuklang ula ioh ia ka lad ban pyniakhaid hynrei ka bol kaba ula shut jam ka leit dei ia ka diengkol hynrei hadien ar minit, ka Lajong kala ioh thep ia ka kol kaba lai lyngba u Wilbert uba la pyndei da ka khlieh ia ka bol bad kala leit rung syndon shapoh kol.
Ka Lajong kala ioh khur 6 point, ka Nongkseh kala ioh 4 point, ka Mawlai kala ioh 1 point bad ka Rangdajied kam pat ioh point eiei. Ki ar tylli ki kynhun kiba bun point na kane ka Group kin ioh rung sha ka Semifinal hynrei kine ki kynhun kin dang sah ban iakhun shuh shuh ia ki jingiakhun.
Lashai ka sngi Saitjain, ka jingialehkai kan long ha SSA Stadium hapdeng ki kynhun kiba don ha ka Group B, ka Maram FC kan iakhun pyrshah ia ka Nangkiew Irat SC ha ka por 2 baje mynsngi bad hadien kane ka Rymbai Shkenshynriah SC kan iakhun pyrshah ia ka Langsning FC ha ka por 6 baje janmiet.
