“Kylla khlieh khlieh tdong tdong ka VPP” halor ka mat Reservation Policy | “Pyni ia ka jinglong arsap’ ong ki nongpeit pyrman

Shillong, Jymmang 11 : Ka Voice of the People Party (VPP) kala buh ialade ha ka tyrwiang ba kynthah ding halor ka mat iakhih State Reservation Policy hadien ba mih ki jingkren ba paw kum ka jingkren “Khlieh Khlieh Tdong Tdong” bad ka jingpynshai kat kum ka jingsngew bit sngew biang ialade na ka jingpep ban leit iashimbynta ha ka jingialang jong baroh ki seng sain pyrthei ba iakren ia ka kaiphod ka Expert Committee on Reservation Policy.

Ka jingialang jong baroh ki seng sain pyrthei bala pyniaid da u Myntri Rangbah Conrad K Sangma ha ka 6 tarik Jymmang, ka dei kaba la khot ban ai jingbatai ba bniah ia baroh ki seng sain pyrthei halor ki jinglap ba kongsan bad ki jingai jingmut jong ka Expert Committee bala thung ban shong bishar thymmai ia ka State Reservation Policy.

Kat kum ka jingong ka Sorkar, ka kaiphod ka don haduh 21 tylli ki valume bad don jan kumba 4000 sla ia kaba la dep ruh ban sam sha baroh ki MLA hadien bala wanrah ia ka hapoh ka Iingdorbar Thaw Ain myn ha ka 18 tarik Rymphang 2026.

Baroh ki seng sain pyrthei kila iashimbynta ha kane ka jingialang lait noh ka VPP.

Lah ban kdew hangne, kane ka jingialang jong baroh ki seng sain pyrthei (All Party Meeting) ka dei kaba la pynlong halor ka jingmih ka jingdawa na u President ka Voice of the People Party (VPP) Ardent M Basaiawmoit bad MLA ka North Shillong Bah Adelbert Nongrum, kiba la wanrah ia ka zero hour notice ban iatai ia ka reservation Policy hapoh ka Dorbar mang tyngka ba dang shu kut jong ka Iingdorbar Thaw Ain.

Haba wanrah ia kane ka mat, u President ka VPP bad MLA ka Nongkrem ula pynpaw ia ka jingbym pdiang ia ka kaiphod jong ka Expert Committee bad bym sngewtynnad ia ki jingai jingmut ka Committee haba pynpaw ba donkam ban iakren shuwa ia kane ka mat hashuwa ba ka Sorkar kan pyntreikam ia ka.

Ha ka shithi bala phah ha ka 1 tarik Jymmang sha u Deputy Secretary ka tnad Personnel, u President ka VPP ula pynpaw shai ba ka party “kan ym” wan sha ka jingïalang jong ka 6 tarik Iaiong namar ba “ka por kam bit” bad ba ka party ka “dang trei shitom halor ki mat kiba kongsan kiba ïadei bad ka Jylla bad ki paidbah” kiba donkam ïa ka jingbishar kyrkieh.

Ka shithi ka la ong ruh ba ka party “kam lah ban ïashim bynta ha kane ka jingïalang.”
Hynrei, hadien ba sdang mih ki jingshah kynthoh na ki liang bapher bapher namar ka jingpep sha kane ka jingialang kaba kongsan, ka VPP kala pynmih pat ia ka kyrwoh ba thymmai ha ka 9 tarik Jymmang, bad kala ai pat da kawei ka daw kaba iapher bak ly bak halor ka jingpep ia ka jingialang.

Ha kane ka sien, ka VPP kala kam ba ka jingleit bym leit jingialang ka dei kaba da leh khnang bad ka jingsngew kat kum ka jinglong ka sain pyrthei,” haba pynksan ba ka jingialang ka dei tang ka jingpyndep sain pyrthei hynrei ym ka jingpyrshang kaba shisha ban pynbeit ia ka mat Reservation Policy.

Ka jingiapher kaba shai kdar hapdeng ki artylli ki jingai daw, kala pynmih ia bun ki jingkylli halor ka jingiai neh jong ka Party bad ka jinglah ban shaniah.

Kane ka jingiapher kala thad madan ruh ia kaei kaba ki kynhun pyrshah ki shim kum ka “sain pyrthei kaba da jied”-ka jing kylla ktien kaba shong kat kum ka jingiaid ka sur u paidbah ha ka jaka ban ieng skhem ha ka nongrim ba ka ieng naduh kaba sdang.

Kaba thamula, ki khubor ba ioh lum ki iathuh ba katba ka jingialang jong ka All Party Meeting ka dang long ha Shillong, ki nongialam ka VPP kila iadon lut khrui ha Jowai ban ialap elekshon na ka bynta u kyrtong u ban iakhun ia ka elekshon shiteng samoi ha Shillong Lok Sabha.

Kane ka jinglong jingman ka pynphai khmat sha ka VPP naba kane ka seng sain pyrthei ka dei kaba lamkhmat ha ka jingdawa ban bishar thymmai ia ka State Reservation Policy bad pynlong wat ia ka jingshah thngan kaba la pynbor ia ka Sorkar ban thung ia ka Expert Committee. Wat hapdeng ki jingiai kynnoh ba ka Sorkar ka kyntait ia ka jingiakren ba thikna halor kane ka mat, kane ka party ka jied pat ban nym iashimbynta ha ki jingiasyllok kiba kongsan, haba aidawa ia ka jingbunkam ha kiwei pat ki mat kiba kham kongsan (ka eleskhon).

Ki jingkylli ki mih ruh halor ka jingpoi dorbar jong ka Iingdorbar Thawain ka Jylla da kiba bun ki MLA ka VPP, kynthup u President ka party Ardent Miller Basaiawmoit, uba ju shah kynthoh bunsien ha ki liang pyrshah ia ka jingpep/jingjah Dorbar, jingkloi ban mih jyndat napoh ka Iingdorbar, haba pynksan ruh ia ka party kum ka sur kaba jam tam jong ka Liang Pyrshah hapoh ka Iingdorbar.

Ki nongpeit pyrman ki kam sain pyrthei, kila kdew ia ka jingthamula jong ka VPP kaba ju kynnoh ia kiwei ba kim don ia ka jingshimkhia halor ki jingiakren haba ialade pat ka shu lapmiet ban ieng pyrshah, mih jyndat na iingdorbar bad ka jingpep dorbar wat haba don ki mat iatai kiba kongsan, kiba ktah ia ka Jylla bad ki nongshongshnong trai ri trai muluk.

Kane kynrum kynram kaba mih na ka All Party Meeting kala nang bynrap ia ki jingkynthoh pyrshah ba ka VPP ka jied ia ka sain pyrthei ba shu kyntur paidbah ha ka jaka ban ieng bad mihkhmat dalade ban iasaid ha ki rynsan jingiakren kiba kongsan.