Ki lad pathai khubor ki long laitluid pura ha Meghalaya | Hap ialeh pyrshah ia ki khubor lamler : Rumbui

Shillong, Jymmang 010: U Myntri ka tnad Information and Public Relations (IPR) Bah Lahkmen Rymbui ha ka sngi Saitjain, ula ong, ba ki nongpathai khubor ha Meghalaya ki ioh ia ka jinglaitluid kaba pura bad ula kyntu ba kidei ban thoh pat ia ki jingshisha bad ban iakhun pyrshah ia ki jingialam bakla na ka jingkiew jong ki Social Media.

Haba kren ha ka jingrakhe ia ka World Press Freedom Day kaba la pynlong da ka Shillong Press Club bad ka Directorate of Information & Public Relations ha Shillong Club, u Bah Rymbui ula ong ba ka jylla kala don ia ka dustur jong ka jingailad ban pynsngew laitluid.

“Haba ngi kren shaphang ka sngi laitluid jong ki nongthoh khubor ha ka pyrthei ne World Press Freedom Day, ha kaba iadei bad ka Meghalaya. Ngam tip shuh naei ngan sdang, namar nga sngewkmen bha ba ha ka imlang sahlang ha Meghalaya naduh ka por kiba rim, kala don ka jinglaitluid. Uwei pa uwei u don ka jinglaitluid ban pynpaw ia ka jingsngew kaba nalade, ban pynpaw ia ki jingmut jingpyrkhat bad ia ki jingbynniaw” ula ong.

“Nga dap ruh da ka jingkmen ba ki sorkar jylla kim kim ju pyndonkam ne pyndonkam ne pyndonkam bakla ia ki lad pathai khubor na ka bynta ka jingmyntoi ka jong ki” ula ong.

“Ka don ka jingiadei kaba jan hapdeng ka Sorkar bad ki lad pathai khubor, hapdeng ki lad pathai khubor bad ki bor sorkar, kumjuh ruh bad ki bor khmih ia ka ain, kumjuh ka jingiadei ki lad pathai khubor bad ki nongialam shnong bad baroh hi”.

“Ngi long kiba donbok shibun, khamtam ha kine ki sngi kaba ngi la iohi ha kylleng ka pyrthei, wat ha ka ri jong ngi ruh, kila don katto katne ki jingpyrkhing bad katto katne ki jingpynbor na kino kino, ia kaei kaba dei ban leh bad kaei ka bym dei ban leh” la ong u Myntri.

Ula ong ba ka kamram jong ki lad pathai khubor kala kylla long kaba kongsan bha hadien ka jingsaphriang ka khlam COVID.

“Naduh ka por jong ka COVID-19, ngi lah iohi ia ka jingkordor ki lad pathai khubor hynrei kila hiar khyndiat na ka jingmih ki rynsan ha ki social media. Ka long kaba eh bha ia ki paitbah ban bishar kaei kaba dei bad kaei kaba bakla” ula ong.

“Haba ngi peit ia ki kot khubor mynta, ngim tip shuh kadei ka kotkhubor ne ka ‘Tabloid’ kot khubor rit ne tang ka kot khubor pynmih ia ki jingpynbna ne ‘Advertisement’. Kumta ka jinglaitluid ki lad pathai khubor kadei ba kin pynkup bor ialade ha kane ka pyrthei kaba iar kaba mad ia ki jingtynjuh kaba man la ka por” ong u Bah Rymbui.

“Kaei kaba nga kwah kyntu ia phi, ka long ba phi don ia ka jinglaitluid kaba pura ha Meghalaya. Lada phi kwah ban tei ia ka imlang sahlang kaba khlain bad kaba khih ba ksar, ka imlang sahlang ka lah ban ai sha ki paitbah, phi don ia ka jinglaitluid ban pathai khubor ia kaei kaei ruh kaba phi mon, katba ka dang dei hi ka jingshisha. Hynrei lada phi kwah ban pynkylla pat ia ka jingshisha, kata kadei ka jingeh” ula ong.

“Haba pathai khubor halor ki jingshisha, baroh ki sorkar, ki bor kiba dei khmih, ki tnad ki kloi ban pdiang namar ba ki tip ia ka kamram jong ki lad pathai khubor kiba long u paia ba saw ha ka imlang sahlang. Kadei ka kamram ka jongki ban ai ia ki jingtip kiba dei sha ki paitbah” ong u Bah Rymbui.

“Mynta ka sngi, nga kyntu ia ki paralok lad pathai khubor, to ngin pyrshang ban long kiba thymmai ha ka rukom pyrkhat jong ngi bad kumno ban iakhun ia ka jingtynjuh jong ka jingsam ia ki jingtip kiba bakla, kumno ban iakhun ia ka jingtynjuh na ka jingpynkylllain noh ia ka jingshisha, khnang ba ngin lah ban tei ia ka imlang sahlang kaba kan don ka jinglaitluid ia baroh, ym tang ia ki lad pathai khubor, hynrei ka jinglaitluid ia ki paitbah ba kin pynpaw ia ka jingsngew ka jongki khlem kano kano ka jingshah khanglad” la ong u Myntri Sorkar.

Ha kaba iadei ka jingdon ka jingkylla ha ka rukom pdiang ia ki khubor, u Bah Rymbui ula ong, “Kumba ngi lah iohi ha kine ki sngi kiba mynta, wat lada ka long katno katno ka khubor kaba bha kaba la pathai, yn ym don kiba pule pat ia ka. Ka ‘Heading’ ne ka Mat ka long kaba kongsan bha mynta. Lada phi peit mynta ia ka rukom pathai khubor, kam don satia kano kano ka jingiadei hapdeng ha ‘Heading’ bad ki pasoh ha ka khubor. Bun ha ki Social Media ki pyrshang ban ai ia ka ‘Heading’ khlem ka pasoh baroh kawei”.

“Ngim long kiba bit ba biang pura hynrei ngi donkam pat ia ka jinglaitluid ban pathai ia ki jingshisha, ban pathai lut baroh. Lem kumta ki lad pathai khubor kin sa shah knieh noh ia ka jaka ka jongki ha ki Social Media, Bloggers ne kiwei kiwei” ula ong.