Shillong, Jymmang 8: U Symbud Myntri Rangbah ba khmih ia ka tnad Transport Bah Sniawbhalang Dhar ha ka sngi Thohdieng ula ong ba ka work order na ka bynta ban shna pynheh ia ka Umroi Airport, kaba shongdor T.80 Klur, kadei kaba la dep ban aiti bad la khmih lynti ba shen kan sa sdang noh ka kam.
“Ha kaba iadei bad ka Umroi Airport, ka jingtrei ban pynheh kadei kaba la dep ban pynkhamti. Kumta kin sa sdang noh ia ka kam, kaba long kumba T.80 Klur ka work order ia kaba ngi la dep ban aiti” ong u Bah Dhar haba iakren bad ki nongthoh khubor.
Ula ong ba ia ka projek dei ban pyndep hapoh ka 18 bnai kumba la kdew ha ka work order.
Halor ka jingdawa ban shna ia ka surok kaban pyniasoh ia ka kad Liengsuin na ka Shillong bypass, u Bah Dhar ula ong ba ki kam ki jam ki dang iaid mynta shakhmat.
“Ka kam kala iaid shakhmat. Ka surok na Belfont-Langkyrding sha ka New Secretariat bad nangne beit beit sha Airport, kane ka surok kala iaid shakhmat bad ka tnad PWD kala dep ban bhah T.135 Klur da ka tnad PWD” ula ong.
Ha kaba iadei bad ka jingshim jaka ban pynheh ia ka kad liengsuin, u Symbud Myntri Rangbah ula ong, ba donkam ban pynlong lang ia ka jingjurip hashwa ban pynthikna ia ka jaka.
“Nga lah ong ha u bnai ba la dep ia u Deputy Commissioner ban khmih biang bad ban pynlong biang ia ka jingjurip bad ka Airport Authority of India ban pynthikna ia ka jaka kaba dang donkam shuh shuh kaba ngi hap ban shim” ula ong.
Ula batai, “Hashwa ba ngin shim ia ka jaka, ka jingleit jurip lang kadei kaba hap ban leh hapdeng ki ophisar ka sorkar jylla bad ka AAI khnang ba ngin ym shim ia ka jaka kaba bakla. Ngi hap ban khmih ia ki bynta kiba dei, ia kane bad katai bad haba kila ong, ba kala long kaba biang, kumta kan ym don jingeh ia ngi. Ngi lah long kiba la kloi ban thied ha kano kano ka por, hadien ba ka jingjurip lang kala phah ia ka kaiphod sha ngi”.
