Shillong, Jymmang 08 : U High Commissioner ka Australia sha India Phillip Green, ula wan iakynduh ia u Lat ka Jylla CH Vijayashankar ha Lok Bhavan ha ka sngi Thohdieng, ha kaba ka jingiakren kala iaid halor ka higher education, ka water sports, ka roi ka par ba neh, bad ka jingiada kat kum ka riti synshar ia ki riewlum.
Ha kane ka jingialang la iashimbynta ruh da u Bernard Lynch, Consul General ka Australia sha India bad u HC Chaudhury, Additional Chief Secretary sha u Lat ka Jylla.
Ka jingialang kala sakhi ia ka jingiakren kaba don jingmut halor ki kam ki ban ai jingmyntoi lang, kynthup ka higher education, ka jingpynroi ia ki kam na ki wah kynthup ka water sports kum ka surfing, kayaking, water skiing bad diving, ka roi ka par ban eh bad ki kabu ban iatreilang kham bun hapdeng ka Australia bad Meghalaya.
Ha ka jingiakren, u Green ula iaroh ia ka jingiada kat kum ka riti synshar ia ki riewlum ha ka Jylla Meghalaya bad pynpaw ia ka jingkwah ban sngewthuh bha ia ka rukom long ka imlang sahlang bad ka kolshor bad ki kyndon ka riti synshar ba iadeibad ka jingiada ia ka hok ki riewlum nalor ban pynneh pynsah ia ka jinglong ba kyrpang bad ka pateng jong ki riewlum trai muluk ka Jylla.
ULat ka Jylla ula ai ka jingbatai halor ka jingtreikam ka synshar paidbah nala tynrai ka Meghalaya, ka jingiada kat kum ka riti synshar bad ka jingkongsan ban pynneh pynsah ia ka dustur ba riewspah haba beh ia ka jingkiew bad ka roi ka par ba kynthup lang ia baroh.
KI arliang mamla kila iakren halor ka higher education, iakhmih ia ki lad ki lynti ban iatreilang ha ka pule dangle, ka jingpyntreikam ia ka student exchange programme, ban iatreilang ha ka jingleh research, ka jingiasam lang ia ki jingtip hapdeng ki jaka pule ka Meghalaya bad Australia.
Ka jingiakren ka pynleit jingmut ruh halor ka jingkongsan ban pynkhlain ia ka jingiatreilang ha ka kam pule dangle ban pynkupbor ia ki samla, kyntiew ban sei ia ki buit treikam thymmai, bad nang pynjanai ia ka jingpule higher education hapoh ka Jylla.
Haba khmih ia ka jingriewspah ka Meghalaya ha ki marpoh khyndew bad ka jingitynnad ki jaka, ka jingiakren kala long ruh halor ka jinglah ka Jylla ban kyntiew ia ka ec—tourism, adventure tourism bad ka jingpynroi ia ki kam ba lah ban leh na ki wah.
U Lat ula batai halor ka jingdon ka Meghalaya ia ka spah mariang kaba kyrhai bad pyntip sha u High Commissioner ia ka jingriewspah ka Jylla ha ki jingthung jingtep bad ki mrad ki mreng bad ka jingdon pahuh ia ki kynbat dawa na ka bynta ka jingwadbniah, ka jingsumar bad ki lad kamai kiba neh”.
Shuwa kane, u Green ula iashimbynta ha ka prokram bala pynlong da ka Asian Confluence ha Shillong, kaba la iakren halor ka jingpynkhlain ia ki jingiatreikam bad ki ri ka pyrthei, ki lad pyniasoh ha ka thain bad ka jingpynsuk ia ka academic bad cultural exchange.
Ka jingwan jong u sha Meghalaya ka pyni ia ka jingkwah ban pynkhlain ia ka jingiatreilang hapdeng ka Australia bad ka thain Shatei Lam Mihngi ka Ri India.
