Shillong, Jymmang 07: U National President ka NPP bad Myntri Rangbah ka Meghalaya Conrad K Sangma ha ka sngi Palei ula ong ba ka por ba eh bala mad ka party ha Assam kan ym pynsangeh ia ka jingiaid lynti ka party, haba ban jur “ka jingshlur ban shim ia ka sienjam ba nyngkong” ka batai shaphang ka party.
Haba kylli kaei kaba la bakla ia ka NPP ha Assam, u Conrad ula ong “Kam shym la don kano kano kaba bakla. Kaei kaba kongsan ban shimkhia ka long ba ngim shym la riej ban mih iakhun. Ngi don ka jingshlur ban jam shakhmat. Ha kiba bun ki jaka, Nga kynmaw ha Manipur ha ka por ba ngi sdang, ngi ioh arngut ki briew kiba iasoh bad ngi bad kane ka dei ka jingsdang jong man ki lynti iaid kiba jrong da ka sienjam ba nyngkong”.
Ula ong ba ki jingeh ki long shibynta ban tei ia ki nongialam. “Nga tharao kaei kaba kongsan ka long ban don ia ka jingshlur ban lah ha kaban shim ia kata ka sienjam wat hapdeng baroh ki jingeh bad jingjynjar ba baroh ki mad bad kane ka dei kaei kaba batai ia ka Party bad kane ka dei kaba batai ia ka jinglong nongialam” ula ong.
“Ha ngi, hooid, ngi mad ia ka kylla kaba eh bha ha Assam hynrei kane kam pynduh mynsiem ia ngi namar kaei kaba kongsan ka long ba ngi la shim ia ka jingshlur bad shim ia ka sienjam shakhmat bad kham kongsan tam ngin shim ia ki jinghikai na ki jinglong jingman kiba mih bad pynthikna ba ngin pynjanai bad ngin nang kham biang ha ki snem ban wan” bynrap u Conrad.
Halor ka jingkam ka BJP ba kan ialam ia ka Sorkar Meghalaya ha u snem 2028 hadien ka jingjop jong ka ha West Bengal bad Assam, u Myntri Rangbah ula ong ba ka raiu paudbah kan dei ka rai ba khatduh.
“Kino kino ki seng sain pyrthei ki lah ban ong ia kano kano ruh, kane ka dei ka jingkwah jong ki, mano mano ruh ki lah ban ai jingkren bad ki long laitluid ban ai jingkren hynrei haba kut ka sngi, ki dei ki paidbah ki ban rai bad u dei u nombor u ban rai mano ban thaw Sorkar. Ngi la iohi ia ki nombor ha ki snem bala leit bad man ki seng sain pyrthei ki long laitluid ban lum ban lang, kumta ka biang beit. Man ki seng sain pyrthei ki don ia ka hok ban ong kat kaba ki mon, ngam don eiei ban kynthoh” ula ong.
