Nongstoiñ, Jymmang 05: Ki nongshong shnong jong ka shnong Umdang ryngkat ka jingïasnohktilang bad kiwei pat ki shnong kiba marjan bad kiba na katei ka thaiñ, ha ka sngi Ba-ar, ki la mih paidbah ban pynrem ïa u riew thrang snam u ba la pynïap dusmon ïa u heprit Endrixsonfelix Mawsor ba dang 3 snem tam ka karta, katba u dang wan na la skul, ka jingjia kaba la jia ha kine ki khyndiat taiew kiba la dep.
Ïa katei ka jingpynrem la sdang da kaba ïaid rally na madan Skul Rorin Govt Umdang ter ter sha Parish Compound bad la pynkut pat da ka jingïalang paidbah kaba lyngkot ha ïew Umdang kawei na ki shnong kaba don ha ka thaiñ Shallang Mawshynrut West Khasi Hills District.
Ha katei ka sngi la ïashimbynta naduh ki khynnah skul bapher bapher, ki seng longkmie, ki sengbhalang bapher bapher jong ka thaiñ kiba kynthup ïa ka seng All Lyngngam Organisation bad kiwei kiwei, kumjuh ki riew rangbah jong ka thaiñ kiba la ai jingkren ha katei ka jingïalang.
Kum ban shu pynkynmaw ba katei ka jingjia kaba la pynpar ñiangkhriat ïa kiba bun balang, ka la jia myn ha ka 22 tarik u Ïaïong 2026 ha kaba u Imphal Mawsor u ba la 50 snem ka karta u ba dei u kñi para kur jong utei u heprit Endrixsonfelix Mawsor, u la pom da ka wait na ka khlieh une u khynnah haduh da ïap hashen.
Shuwa ka jingïalang, la pynlong ïa ka jingsngap jar kaba shi minit bad la thang ruh ïa ki mombati.
Na ka liang ki nongkren kiba bun ki la pynrem jur bad kyntu sha baroh ki para nongshong shnong naduh ki rangbah, ki samla bad ki longkmie ba ki dei ban shimkhia, ba kiba kum kine ki jingjia kim dei ban jïa shuh bad ba baroh kin ïatreilang na ka bynta ka bha ka miat ha ka imlang sahlang.
Ha kajuh ka por ka jingïalang ka la dawa ba ki bor jong ka aiñ ki dei ban shimkhia bad leh ei ei kloi lan ban pynshitom ïa u nongleh kam sniew katkum ki kyndon jong ka aiñ.
