Shillong, Jymmang 02 : Ka Justice BP Katakey Committee ha ka 37th Interim Report bala aiti sha ka Iingkashari Meghalaya High Court, kala ai jingmut ia ki lad ki lynti ba thymmai ban tehlakam ia ka jing tih dewiong beain bad jingshalan, kynthup ka jingpyntreikam pyrrkhing ia ka SoP 2024, jingpyndait GPS ha ki trok, ki smart check-gate bad ka jingtynrong shimet ia ka jingkitkhlieh ha ki Ophisar.
Ka Committee kala pynpaw ia ki jingdkoh ha ka jingpyntreikam bad jingpynslem ha ki jingbthah bala ai mynshuwa haba lum thup ia 21 tylli ki jingai jingmut na ka bynta ka jingshong pyrkhat jong ka Iingkashari ban khang syndon ia ka kam tih dewiong beain hapoh ka Jylla.
Ka Committee kala ban jur ia ka “jingpyntreikam pyrrkhing ia ki kyndon bapher bapher jong ka SoP, 2024, khnang ban khanglad ia ki kam tih dewiong beain, kynthup ka jingshalan ia u dewiong napoh bad shabar jong ka Jylla Meghalaya, lem kumta kan ym long kaba lah ban khang ia ki kam tih dewiong beain”.
Kala kyntu ruh ban pynshisha ia ki kot ki sla bala ai da ka M/S Star Cement Meghalaya Limited bad Star Cement Limited ha ka “jingshalan ia u dewiong ba 2,93,569.349 MT da ki 8174 tylli ki trok hapdeng ka 02/01/2025 haduh 28/02/2026” bad dawa ban leh eiei “lada jia ba ym don/ lah ban ai ia kino kino ki sla ki sla, kiba donkam ban ai hapoh ki kyndon ka SoP”.
Ka kaiphid kala ai jingmut ruh ban tohkit ia ka jingpynkhein ia ki SoP, haba kdew ba ka trok ba don u nombor ML-11-A-1473” kaba la akisen ha ka 04/03/2026 ha shnong Byndihati kaba la wanrah ia ka jingmynsaw ia bun ngut ki briew bad ka jingiap jong kawei ka kynthei,” haba iadei bad ka Khliehriat PS Case No 106(03)/2026.
Ban pyrrkhing tyngeh ia ka jingpeitngor ia ka jingiaid u dewiong, ka Committee kala ai jingmut ban pynkylla ia ki rukom pyniaid ia ka jingshalan ia u dewiong na ki mining lease.
Kala ai jingmut ban “pyndonkam ia ki kali ba pyndait ia ki Global Positioning System (GPS) devise ban shalan ia u dewiong” ha ryngkat ka jingai jingtip ba bniah sha ka Directorate of Minerals Resources, Shillong.
Kiwei pat ki lad ki lynti ki kynthup ia ka jingtah ia ki sticker bala jied kyrpang ia ki rong, ki ban ai da ka Directorate of Mineral Resources, Shillong, kiba hap ban tah ia ka bynta ba lah ban iohi bha jong ka iit ba shakhmat ka kali bad ka “jingbuh ia ki lynti iaid sha ka jaka pynpoi mar bad ka jingpyntreikam ia ka Smart Integrated Exit Check-Gate (s) kaba hap ban iaid lyngba ki trok”.
Ka Committee ka bthah ruh ban phah pyni ia ki “invoice/E-Way Bills kaba long kat kum ki kyndon ka GST, ka certificate of origin, ka weighment slip bad transit pass ha ka exit check-gate da ki nongkhaii”.
Ka kaiphod ka tynruh ban pynieng ia ki Integrated Smart DMR Check-Gates ha ki jaka kiba iahap ha ka surok kynthup ka Nangalbibra-Mendipathar Railway Station, Rongjeng-Dainadibu bad Nangalbubra-Gasuapara.
Lah ai jingmut ruh ban pynieng ia ka smart check-gate ha ka thain Athiabari ha South West Khasi Hills District bad marjan ka Athiabari Police Outpost ban khanglad ia ka jingshalan ia ki dewiong ba tih beain sha Assam.
Halor u dewiong ba tih beain, ka Committee ka ong ba dei ban shim ia ka sienjam ban shalan noh ia u dewong ba tih beain uba la don haduh 1,55,390.6 MT, ha kaba 1,92,840.13 MT la lap da ka M/S Garuda UAV ha ka jingleh aerial survey” ban ithuh ia ki depot, bad ban pyndep ia ka jingshalan hapoh ki taiew ba kut u Iaiong 2026.
Kala bynrap ba ka jinglilam ia u dewiong ka dei ban iaid hadien ba ioh ia ki hukum kiba donkam.
