Sakhi ka Jylla ia ka jingmih ki nongiakura ba tbit ka Jylla na ka State Boxing Championship 

Shillong, Jymmang 01:  Ka rynsan ia kura kaba la tip ia ka kum ka State Boxing Championship 2025-26, ka la poi noh sha kaba kut hynnin ka janmiet, ha Mawlai Mawroh, kaba lyngba kane ka rynsan, ka sei madan pat ia kawei ka khana ne ka parom jong ka jingkhreh ban mihpaw ki rang bad ki thei ia kura ba kynsai kiban long pat ka lawei kaba phyrnai ia ka jylla hi baroh kawei.

Kane ka rynsan iakhun kaba saw sngi lynter, kadei kaba la pyniaid ia ka da ka Meghalaya Boxing Association (MBA) ia kaba la kyrshan pat ia ka da ka tnat jong ka Directorate of Sports and Youth Affairs.

Kumban shu pynkynmaw ba ha kane ka rynsan iakhun la kiew rynsan haduh 105 nhgut ki rang bad thei ia kura na ki 8 tylli ki district bad kumjuh na ki klob, ha kaba ia kane ka rynsan iakhun la pynlong naka bynta ki khynnah shynrang ba dkynthei kiba 15-16 snem bad 17-18 snem ka rta.

Kongsan ba la wan ban ia sakhi lang ia ki kato katne tylli ki jingiakhun phainal dei u MLA jong ka Mawlai u bah Brightstarwell Marbaniang bad don lang ryngkat u Lakshay Sharma uba la wan ban mihkhmat na ka bynta ka Delhi Public School bad ka SHAIL Group.

Ha kaba kut jong kane ka jingiakob, saw tylli ki nam rang bad thei ia kura ba kynsai (Best Boxer ) la ioh ban sam ha kane ka janmiet, kaba kynthup ia ka Evangellyne Sohbar  napoh Ri-Bhoi bad u Damonlang Marbaniang ka Green Heart Boxing Club kiba la rah ia kane ka nam ha ka kyrdan iakhun jong ki junior.

Katba ka Ekyrpangmeki Sohiong jong ka Ri-Bhoi bad u Amethyst Synnah ka West Jaintia Hills ki la rah ia kane ka khusnam ha ka kyrdan jong ka Youth.

Katba ka khusnam Emerging Boxer  jong kane ka rynsan iakhun la rah ia ka da u Casbe K Marak  ka West Garo Hills.

Haba phai sha ki phainal jong kane ka rynsan iakhun man kawei pa kawei ka jingiakhun ka long kaba iabiang bor, ba iakhaid bha, katno tam lei lei ha ka por ka jingiakhun phainal jong ka kyrdan iakhun kiba la sdang ban khie ban san (youth category), ha kaba saw na ki 6 tylli ki jingiakhun ki la kut noh ha kaba u nongpyniaid ne referee u la hap ban pynsnageh noh hi da lade ia ka jingiakhun.

Kumba ka long ia mynta, na ka liang ka MBA ka la lum la lang kumba 45 ngut ki rang bad thei ia kura ki jong ka, ki la don hapdeng ka jingpynkhreh kaba janai bha ialade ban mihkhmat ia ka jylla ha ka por ba kan sa pynlong ia ka lympung bah ialehkai jong ka ri, ka National Games ha u snem ban sa wan, ia kaba na kane ka rynsan iakhun, lehse ka MBA kan sa lah ba kan nang pynrung shuh shuh ia la ki rang bad thei ia kura sha kane ka kynhun pynkhreh iakhun ha ka Nationals Games.