Shillong, Jymmang 01 : U Myntri Rangbah ka Jylla Conrad K Sangma, ha ka sngi Thohdieng, ula mih nala ka jong ka kali bad pynsangeh ia ki kali ba synran ia u (convoy) ban iakynduh markhmat ia ki dkhot jong ka Meghalaya Vocational Teachers Union (MVTU), kiba pynlong ia ka jingiakhih da kaba rah placard shabar ka jingialang pyndon burom, bad kular ba un ai ka jingiarap hapoh u pud halor ki jingdawa ia ka jingsiew ba thymmai.
Ka Union kala pynlong ia kane ka jingiakhih shabar ka madan Student ha Jaiaw, katba dang long ka jingialang pyndon burom bala pynlong da ka Meghalaya SSA School Association bad ka Meghalaya 4th Teachers Association.
Ia kane ka jingialang la pynlong ban ai ka jingithuh ia ka Sorkar Jylla halor ka jingwanrah ia ka jingsiew ba thymmai, kaba thmu ban pynkhlain ia ka jingiada ia ka jingshakri ki nonghikai bad ka jing ioh kaba biang na ka bynta ki nonghikai SSA bad 4th Teacher ha Meghalaya.
Haba iohi ia ki nongiakhih, u Myntri Rangbah ula pynieng ia ki nongbud jong u bad ula hiar na kali ban iakren bad ki.
Ula ular ia ki da kaba ong “Ngan pyrshang ban iarap kat kaba lah ka ban long hapoh u pud. Ngan leh kat kaba nga lah”.
Ki nonghikai kila ai khublei bad iaroh ia ka jingai mynsiem bad ka jingkular jong u Myntri Rangbah.
Shuwa kane, ka President ka MVTU Aibansuk Suchiang kala ong ba ki nonghikai Vocational kila shah ieh shadien na ka jingsiew tulop thymmai bala pynbna ia kiwei pat ki nonghikai.
“Kumba phi tip ba u Myntri Rangbah un pynlait ia ka jingsiew tulop ba thymmai ia ki nonghikai hynrei sngewsih ma ngi ki nonghikai vocational ngim shym la shah kynthuh lang. Ngi sngew ba ngi la shah iehbein” ong ka kong Suchiang.
“Ta ka daw ngi la rai ban wan mih sha surok bad ban iarah placard namar ngi ruh ngi kwah ia ka Sorkar ban kynthup lang ia ki nonghikai vocational hapoh kane ka jingsiew kaba thymmai” kala bynrap.
Ka kong Suchiang ka ong ba kane ka jingdawa ka dei kaba la sahteng da ki snem.
“Kumba phi tip ka vocational education kala sdang naduh u snem 2017 bad haduh mynta yn dang ban ioh ia ka jingkiew tulop lane ka jingsiew ba thymmai lane ka job policy” kala ong.
“Ngi la buh ia kane ka jingdawa naduh u snem 2019 hynrei haduh mynta ym pat shym la leh eiei halor kane ka kam watla ngi la ai dorkhas la bunsien sha ki Myntri bad Myntri Rangbah, ba pynpaw ia ka jingdawa jong ngi ia ka jingshngain ka kam bad ka jingsiew ba thymmai bala pyntreikam ia kiwei pat ki nonghikai” kala bynrap.
Ka Union kala kdew ia ka jingbun ka kam bad ka jingiapher ka jingsiew.
“Ki nonghikai vocational kila shim klas naduh klas IX haduh XII, kaba mut ia ki secondary bad higher secondary hynrei wat hapdeng kane, ka jingsiew jong ngi ka long kaba rit bha” kala ong.
“Ngi sngew ba ngi don ia ka hok ban ioh ia ka jingsiew ba thymmai ban pynthikna ia kajuh ka jingsiew ia ki kam ba long mar kumjuh” kala ong.
 ban iakynduh markhmat ia ki dkhot jong ka Meghalaya Vocational Teachers Union (MVTU), kiba pynlong ia ka jingiakhih da kaba rah placard shabar ka jingialang pyndon burom, bad kular ba un ai ka jingiarap hapoh u pud halor ki jingdawa ia ka jingsiew ba thymmai.){kind=link}