Guwahati, Iaiong 30: Ka Bhabana Sharma, kaba sah ha Guwahati, kaba la jah rngai bad lap ha Shillong, ka la kren ha ki social media halor ka jingjah jong ka bad kynnoh ia ka jingshah blackmail bad shah byrngem byrsit.
Ka Sharma ka la ong ba ka la mih na iing da ka mon sngewbha ha ka 24 tarik u Iaiong, da kaba banjur ba ym don mano mano ba donkti. “Ym don ba ialam ia nga, bad ym don mano mano ruh kiba donkti.Ym don nongñiah Uber ne Rapido kiba don bynta ei ei”, ka la pynshai.
Ka la iathuh ba ka leit sha Jalukbari shwa ban leit na Paltan bazar sha Shillong. Haba kren halor ka khubor jingsngewsih kaba la phah mynshwa sha ki bahaïing jong ka, ka Sharma ka la kam, “Ka khubor kaba nga la phah sha ka kmie jong nga ba nga don hapdeng ka jingma kam dei kaba shisha.Nga la don hapdeng ka jingeh kaba jur bha ha kato ka por.”
Katkum ka Sharma, ka la check in ha kawei ka Hotel ha Shillong marwei, ha kaba ki dur CCTV ki la pynshisha ia ka jingsah jong ka. “Nga la sngew khuslai, nga la sngewthuh bakla bad ngam shym la pyrkhat bha.Ha kawei ka por, nga la pyrkhat wat ban pynkut noh ia la ka jingim, hynrei hadien nga la rai ban wanphai biang”, ka la ong.
Shuh shuh ka la bynrap ba ka la pan jingiarap na kawei ka kynthei ha ka step kaba bud bad ka la ioh ban ia kren bad ka kmie jong ka, hadien kata ka la wan phai noh sha la iing ryngkat bad ka jingiarap na ki Pulit Assam.
Haba pynpaw ia ka tynrai jong katei ka jingjia, ka Sharma ka la kynnoh ba ka don ka jingiadei bad u Nihar Jyoti Sarma la ar snem kynthih bad ka la mad ia ki jingshah byrngem.“La iathuh ia nga ba lada nga pyrshang ban mih, ki dur bad ki video shimet jong nga kin sa paw paidbah.La byrngem ruh ia nga ban pynmynsaw ia nga bad ia ka iing ka sem jong nga, nga la im hapdeng ka jingtieng la slem bha”, la ong ka.
Ka Sharma ka la pynthikna ba ka la ujor da ka FIR bad ka dang ïatreilang bad ka kynhun tohkit.
Haba kyrpad ia ki paidbah, ka la kyntu ia ki briew ba kim dei ban shu tharai ne pynphriang ia ki khubor lamler.”Kane ka dei ka por kaba eh bha ia nga bad ia ka iing ka sem jong nga.Nga kyrpad ia baroh ban kiar na ki jingmutdur.Sha kino kino kiba iakynduh ia kum kine ki jingeh—sngewbha kren bad wad jingiarap,” ka la ong bad bynrap ba mynta ka la pynleit jingmut ha ka jingkoit jingkhiah.
