Shillong, Iaiong 28 : U President ka Congress bad MP barim ka Shillong Bah Vincent H Pala ula iathuh ba u dang pyrkhat ban mih iakhun ia ka elekshon shiteng samoi ka Shillong Lok Sabha, bad la khmih lynti ba ka party kan sa shim rai ia u kyrtong hapoh ka 15 tarik Jymmang hadien kawei pat ka jingiasyllok.
Kane ka shuki kala sah thylli hadien ka jingiap noh u MP barim ka VPP Dr Ricky AJ Syngkon ha ka 19 tarik Rymphang.
U Bah Pala ula wan ba-ar hadien u Dr Ricky ha ka elekshon Lok Sabha 2024.
“Nga tharai ba ngim don iano iano ruh. Nga hap ban iakhun hynrei ngi dang ap ia ka jingialang ban shim ia ka rai….dang shen ngi la shong jingialang bad ia ka rai la phah sha Delhi ba nga dei ban iakhun hynrei ngi khlem shim ia ka jingpynsngew jong baroh ki Block bad District” ong u Bah Pala haba iakren bad ki nongthoh khubor ha ka sngi Ba-ar.
“Nga tharai ba ngin sa don biang ka jingialang lehse hadien ka 10 tarik Jymmang, bad hangne ngin sa shim rai” ong u Bah Pala haba pyntip ba ka la don ka jingtyrwa ia ka kyrteng jong u sha ka AICC haba nyngkong, hynrei ula pan por.
“Ka don kawei ka jingialang, kaba kila tyrwa ia ka kyrteng jong nga bad ia kane lah dep ban phah sha Delhi hynrei ha katei ka por, nga ong ia ki ba kin ap shuwa namar nga hap ban iakren bad ki bahaiing lem bad ki paralok, kumta kan bha ngi iashong jingialang biang sa shisien” ula ong.
Haba pyntip ba bun ki nongialam ka party ki kwah ia u ban iakhun, ula ban jur ba kiwei ruh ki lah ban don kiba kwah.
“Kumta,ngin sa shong biang sa kawei ka jingialang bad kyrmen ba kin lah ban shim rai hynrei kam myt pat ba nga dei tang ma nga, ki lah ban don kiwei ruh. To ngin kyrmen bad iapeit hynrei uba bun ula kyntu ia nga ban iakhun” ong u Bah Pala.
