Shillong, Iaiong 28: Ka Sorkar Jylla ka dang ap ia ka kaiphod jong ka Delimitation Committee kaba la thung da ka Garo Hills Autonomous District Council hashwa ba kan shim ia ka rai ban pynlong ia ka elekshon jong ka District Council, la ong u Symbud Myntri Rangbah ka Jylla u Bah Prestone Tynsong hynne ka sngi Baar.
“La thung ia ka Delimitation Committee bad mynta ka dang trei ia ka kam ban peit ia kiei kiei baroh bad ban khein bha kumno bad ban aiti ia ka kaiphod sha ka District Council bad hadien kane ka District Council kan hap ban ioh ia ka jingmynjur na ka iingdorbar bad ban phah sha u Lat ka jylla na ka bynta ban ioh ia ka jingmynjur’” ong u Bah Tynsong haba iakren bad ki nongthoh khubor.
“Kumba long mynta, na ka liang ka Sorkar Jylla ne u Lat ka Jylla ki dang ap ia kata bad shisien ba la mynjur bad la phah sha u Lat, nga ngeit skhem ba ngin sa lah ban ai ia ka jingmynjur” ula bynrap.
Haba kylli halor ka jingbuh ia ka por, u Bah Tynsong ula ong “Katkum ka jingpynbna paitbah, nga tharai ka district council hi ka lah dep ban pynmih ia ka jingpynbna bad kane ka Delimitation Committee kan pyndep ia la ka kam kumba la bthah ia ki hapoh ka por jong ka 3 bnai”.
Lyngba ka Delimitation yn phiah bad pynbeit ryntih ia u pud u sam jong ki constituency hapoh jong ka GHADC.
Ula iathuh, ba ka Council ka hap ban mynjur ia ka kaiphod bad ban ioh ia ka jingmynjur na u Lat khnang ba yn lah pat ban pyniaid noh shakhmat ha kaban pynlong ia ka elekshon.
