Dibrugarh, Iaiong 25: Ha ka jingkhynra kaba la iatrei lang, ki bor pahara ki la kem ia lai ngut ki dkhot jong ka seng kieng atiar ka ULFA-I kaba la shah khang pyrshah ha Nagaland ha ka miet sngi Thohdieng jong ka Mon district.
Kitei kiba la shah kem ki dei kiba la tip kyrteng kum u Lieutenant Gajendra Asom (35 snem) na Tezpur, Lance Corporal Brojen Asom (27 snem) na Jorhat district, bad u Sergeant Puhor Asom (26 snem) na Golaghat District ha Assam.
Katkum ka tyllong khubor na ki pulit, kitei ki lai ngut ki dei kiba thmu ban leit sha ka thain Phomching bad kila shah bat katba ki dang iaid lyngba sha ka shnong Shangnyu.
“U Gajendra Asom u dei ba la pynïasoh bad kane ka kynhun ha u snem 2011, katba u Brojen Asom bad u Puhor Asom kila pynïasoh ha u snem 2022 bad 2019. Ki dei ki riew dkhot jong ka ULFA-I kiba donkti ha ki katto katne ki kam kiba ïadei bad ka jingdawa pisa,” ong uwei u heh pulit.
Ha kawei pat ka jingkhynra kaba kyrpang, uwei u dkhot ba shit rhem jong ka NSCN (IM) ula pyndem noh hakhmat ki shipai jong ka Khonsa Battalion jong ka Assam Rifles ha ka thain Sanliam jong ka Tirap district, Arunachal Pradesh ha ka sngi Saitjain.
Une u dkhot uba la tip kyrteng kum u SS Lieutenant Thinwang Deosa (60 snem) na ka shnong Sanliam kaba hap hapoh ka Lazu Circle u la pyndem noh hakhmat ki pulit ka Tirap bad ki shipai 44th Assam Rifles ha ophis jong u Superintendent of Police ha Khonsa.
U la pyndem noh ia ki tiar ialeh ryngkat bad ka suloi 7.65 mm ba la shna ha US, kawei ka magazine bad hynniew tylli ki kuli.
Ki heh ophisar kila ong, ba kane ka jingpyndem noh ka long hadien ki jingshah khynra bad lyngba ki jingiakren, kaba la lam pat sha ka jingsuk kaba la mih na katei ka jingiakren.
