Shillong, Iaiong 24 : U Primrose Lamat u kylla long u khlur ha ka lympung ialehkai 5th Meghalaya State League, da ka jinglah ka jong u ban thep haduh 6 tylli ki kol, bad pynlong ia ka Khimusniang SC ba kan lah pynliem ia ka Umkaber SCC da 11-2, ha ka jingiakhun jong ka Group A hynne ka sngi ha SSA Stadium.
Ia kine ki kol, u Primrose u la ioh ba un thep ia ki ha ka minit kaba 16′, 19′, 24′, 38′, 73′, 79.
Ha kawei pat ka jingiakhun jong kane ka juh hi ka group, ka Nongkseh SSCC ka la lah ba kan pynliem da 6-2 ia ka Mawshun SCC, kaba hangne u rang ialehkai ba dang shu dep ban soi shen, u Sheen Sohktung u la thep haduh lai tylli ki kol, ki ba la wan ha ka minit kaba 37′, 89′, 90’+4.
Katba ka result na ka jingiakhun ka Group H ha Mawkyrwat, ka Rangdajied United FC ka la mad ia ka khubor lam pongpet hadien ba ka la lah tang ba kan shu iakhaid noh da mar shi kol bad ka kynhun ialehkai ka Mawlarshong SC.
Haba phai sha kane ka jingiakhun, u Hopefullness Wanniang u la lah ban lam khmat ia la ka kynhun ban tam shakhmat da ka shi kol ha ka minit kaba 18, ia kaba u Gideon Mukhim ka RUFC u la ioh ia ka kabu ban pynphai noh ia kane ka kol ha ka minit kaba 41.
Ka kynhun ialehkai ka Mawlai SC kaba bat ruh ia ka nam kum ka lahduh jong kane ka lympung, ka la lah ba kan pynliem noh ia ka Laskein SCSC 4-1, ha ka jingiakhun kaba dei naka bynta ka Group C ba la long ha Amlarem.
Katba ka jingiakhun ha Mairang, kaba pynlong ia ka jingiakhun ka Group F, ka Langsning FC ka la lah ba kan pynliem da 6-0 ia ka Umlakro SC.
Katba ka khubor na ka jingiakhun jong ka Group B ba la long ha madan MFA Turf Third Ground Polo, ka Nangkiew Irat FC ka la pynliem da 7-1 pyrshah ia ka Mawlum Tyrsad, kaba hangne u Neblejohn Lyngkhoi u la lam khmat ia ka kynhun ban thep haduh lai kol ha ka minit kaba 9, 12, bad 42.
Ha ka jingiakhun jong ka Group G, ka Attong Matgrik FC ka la beh nadien ban khur ia ka nam jop ha kane ka lympung hadien ba ka la lah ba kan pynliem ia ka Maram FC da 2-1, ka jingiakhun ba la long ha Williamnagar.
Ka result na ka jingiakhun ba la long ha Khliehriat, hapdeng ki artylli ki kynhun ba dei na ri lum Jaintia, ka Rymbai Shkenshynriah SC na East Jaintia Hills ka la lah ba kan pynliem ia ka Ladthadlaboh SC na West Jaintia da 3-0 kaba dei ka jingiakhun ka Group D bad ia kine ki lai kol, la thep ia ki da u D. Skilful Tariang (33′) bad Hesmiki Rymbai (51′, 81′).
Ki jingiakhun lashai ka sngi ban long ha ka por 3 baje nohhphai sngi :
Group B (Shillong MFA Ground) – Mawphu SC vs Mulang SC Nongbah
Group C (Amlarem) – Amlarem SC vs Lamin XI SCC
Group D (Khliehriat) – Jalaphet Moochut Pyrdung SC vs Thangskai Tiger SC
Group E (Wahiajer) – Lumphyrnai Sohphoh FC vs Iatyllilang Lumsehkot CSC
Group F (Mairang) – Mishon SSCC vs Lawbah SC
Group G (Williamnagar) – Balmanduri FC vs A’chik SCO Rongjeng
Group H (Mawkyrwat) – Mawten SC vs SS Umdang Pyllun
