Shillong, Iaiong 22 : Ka Sorkar Jylla kala kyrpad ia ka Sorkar Pdeng ba kan buria bailutsan sha ki trai jong ki jaka kiba hap shabar ka jingker sainar shah ha khappud ka India-Bangladesh,haba shim ia ka kum ka “kam kaba dei hok” ba ktah ia ka kamai jakpoh.
Kat kum ka jingong u Symbud Myntri Rangbah ba khmih ia ka kam Pohiing Bah Prestone Tynsong, ki jaka khappud ki bym pat ker sainar ha khappud ka India-Bangladesh ki dang don kumba 50 Km eiei.
“Ngi la pyrshang kat kaba lah ban pynthikna ia ka jingker sainar noh ha kine ki 50 km tam ne duna. Hynrei, ngi la mad ruh ia ki katto katne ki jingeh” ula ong haba iakren bad ki nongthoh khubor.
U iathuh ba ki trai jaka bad ki Rangbah Shnong kila pyrshah ia u pud ban ker sainar namar bun ki jaka rep kila shah pynhap noh sha ka no man’s land.
“…katto katne ki trai jaka bad ki Rangbah Shnong kila ong ba lad aka jingker sainar ka hap iaid na u pud ba buh mynta, kiba bun ki jaka kin hap noh sha ka no man’s land. Lada kane ka long kumta, ka Sorkar India ka hap ban siew ia ka bai jaka bad wat kito kiba hap shabar jong ka jingker sainar” ula ong.
“Kane ka dei ka jingpyrshah na ki trai jaka. Kane ka mat ka dei ha ka jingshisha ka mat ba dei hok bad ngi la iakren bad ka Ministry of Home Affairs ban pynsngewthuh ia ka Sorkar India ba kan ym siew bai jaka tang ia kitp ki jaka ba tei ia ka jingker sainar hynrei ka dei ban long ruh ia ki jaka kiba hap shabar ka jingker…Ki hap ruh ban khein ia kane ka jingduhnong kaba ktah beit beit ia ka kamai jakpoh jong ki trai jaka bad ki nongshongshnong ka Jylla” ula bynrap.
