Tang ka Iingdorbar ba lah pynkylla ia ki Rule | Kyntait u DyCM ia ka dawa synshar Administrator ha GHADC

Shillong, Iaiong 22 : U Symbud Myntri Rangbah Bah Prestone Tynsong ha ka sngi Balang ula kyntait ia ka jingdawa ban synshar noh da u Administrator ha Garo Hills Autonomous District Council (GHADC) haba pynpaw ba ka jingpynjlan ia ka samoi treikam ka GHADC ka dei namar ka jingdonkam ban pynkylla ia ka AD Rules hadien ba mih ka jingkulmar ba pyrshah ia ka jingioh iashimbynta ki bar jylla ha ka elekshon ka Council.

Haba jubab ia ka jingdawa, u Bah Prestone ula ong “Peit, ai ba ngan batai shai bha ia kane. Lada phim hap ban pynjlan ia ka jingtreikam jong ka District Council ha ka dur jong ki nongmihkhmat paidbah, ngan iathuh ia phi ba lad aka Sorkar ka shiti, ngi khot ka Synshar Administrator. Lada thung ia u Administrator, kan don u pud ba u Administrator un mynjur ia ki Bill namar kane ka iadei bad ka jingpynkylla ia ka Rules, pynkylla ia ka Act”.

“Kumta, ngim lah ban shu iakren ha katei ka rukom namar ka dei beit ka kam ban buh kyndon, ka kam ban pynkylla ia ka rules bad ki kyndon. Ym don mano manor uh ba lah ban leh ia kane lait noh tang hapoh ka Iingdorbar Thaw Ain jong ka District Council” ula ong.

Haba kdew ia kine ki jingtynjuh, u Bah Prestone ula ong ba ka Sorkar kam banse ban pynjlan ia ka samoi treikam ka Iingdorbar.

“Kumta, haba buh hakhmat ia kine ki jingeh ba ngi don, ngi la hap ban leh ia kane, ta ka daw balei ka Sorkar ka hap ban pynjlan ia ka Iingdorbar sa hynriew bnai khnang ba hapoh kane ka por, kin lah ban wanrah ia ka amendment hapoh ka Iingdorbar bad ban shim ia ka rai” ula ong.

Ka jingpynjlan kala mih hadien ba khie ka jingkulmar kaba jur halor ka jingioh iashimbynta ki bar jylla ha ka elekshon ka GHADC, kaba pynbor ban pynjlan shuwa ia ka elekshon, kaba la buh kham hashuwa ban long ha ka 10 tarik Iaiong, ban plie lynti na ka bynta ban wanrah ia ki jingpynkylla ia ka AD Rules.

Halor ka Electoral Roll la ka jong, jong ka GHADC, u Bah Prestone ula ong ba ka Delimitation Committee ka dang leh ia kane ka kam mynta.

“Ia mynta, ka Delimitation Committee ki dang leh ia kane ka kam. Ngam pat ioh jingtip hynrei ha ka hukum, ngi la dep bthah ia ki ba kin pyndep ia kane ka kam hapoh ka lai bnai” ula ong.