Shillong, Iaiong 21 : U Symbud Myntri Rangbah bad Chairman ka West Jaintia Hills Regional Committee Bah Sniawbhalang Dhar ula pyntip ba ka jingiakren pynbeit ia ka iakajia pud bad ka Assam kan sa sdang biang hadien bala dep thaw Sorkar thymmai ha kane ka Jylla ba markhap.
“Ka jingiakren bad ka Assam ka dei ka kam kaba iai bteng. To ngin ap ynda la thaw ia ka Sorkar thymmai ha Assam, ngin sa pynbteng biang ia ka jingiakren. Kane ka long kaba shai” ong u Bah Sniawbhalang haba iakren bad ki nongthoh khubor ha ka sngi Ba-ar.
Ula iathuh ba ka sien shong jingialang ban iakren biang ia ka kam ka shong ha ka Assam ba kan thung ia ki Regional Committee.
“Kumba long mynta, ngim tip mano ban long Chairman na ka liang jong ki naba yn dang ban thaw ia ka Sorkar thymmai. Tad hadien bala thaw ia ka Sorkar thymmai, kin sat hung ia ka Regional Committee. Kin sa shim ia ka rai hashuwa ba ngin iakynduh biang” ula ong.
Haba kylli la ia kine ki jingeh lah ban pynbeit hashuwa ka elekshon Meghalaya Assembly ha u snem 2028, u Bah Sniawbha ula ong ba kam don satia kano kano ka jingbuh da ka por.
“Em, ngi la pyrshang beit ban pynbeit ia kane ka kam….Namar ka dei ka kam ba don bynta da ki Jylla, ngi la pyrshang ban pynbeit ia ki jingeh kham kloi kat kaba lah hynrei kam dei ka kam kaba suk” ula ong.
“Ngam lah ban ong la ngin lah ne em ban pynbeit hapoh ka arsnem lane ha ka arbnai hynrei ngi la pyrshang beit ban leh kat kaba lah ha kaban pynbeit kham kloi ia kane ka kam” ula bynrap.
