Shillong, Iaiong 19 : Uwei u rangbah ba kyrteng u Bah Elias Kurbah ba sah ha Mawlai Mawiongrim, Shillong, ula iap hadien ka jingngam jyllop hapoh ka wah Umtrew ha ka thain Umran Dairy, Ri-Bhoi District.
Kat kum ka khubor Pulit, kane ka jingngam jyllop kala jia ha ka por 8:30 baje mynstep hadien ba une u rangbah ula leit sum ha katei ka wah ha ryngkat bad arngut ki paralok ba kynthup ia u Shanborlang Marbaniang ba na Mawiong Umjapung bad u Charleston Gatphoh ba na Mawprem Nohsngithiang.
Ki iathuh ba ki paralok kila pyrshang ban iarap hynrei kim shym la lah satia.
Hadien ba ioh jingtip, ki Pulit ka Umsning Police Station bad ka kynhun Special Rescue Team na Shillong, kila hiar sha kane ka wah abn wad ia ka met bad tang hadien katto katne por, lah ioh ban sei ia ka met.
Ki Pulit kila pynkit noh ia ka met sha Nongpoh Civil Hospital bad la aiti noh ia ka met sha ki bahaiing kiba la kyrpad ban pynlait ia ka jingleh post mortem namar ba kim don kano kano ka jingsuba sniew.
