Shillong, Iaiong 16: Ka Drug Reduction, Elimination & Action Mission (DREAM) ha ka sngi Balang kala pynlong ia ka jingleit jngoh ia ki Vocational Training Institute kiba don ha Shillong na ka bynta ki kynthei, da ka jingthmu ban pynbiang ia ki ban ithuh bad ban lum ia ki samla kiba mad jingeh na ka bynta ban ioh jinghikai pyntbit kum shi bynta jong ka sienjam ban tehlakam na ka jingngop ha ki jingdih pynbuaid.
Ki dkhot jong ka Seng Kynthei Katholik, Lympung ki Seng Kynthei bad kiwei kiwei ki Seng Kynthei na kylleng ka sor Shillong kila leit jngoh ia ka Industrial Training Institute (ITI) Shillong, Don Bosco Youth Centre (DBYC) bad ka Don Bosco Technical School (DBTS) ha ka 15 tarik u Iaiong, 2026.
U Director jongka DREAM Mission u Bah Francis Kharshiing ula ong, “Ka jingleit jngoh ka long da ka jingthmu ba kine ki kynhun jong ki kynthei bad longkmie kin sakhi ia ki jingai jinghikai pyntbit kaba la ai da kine ki jaka hikai, khnang ba kan pynlong ia ki ba kin leh ia ki bynta kiba kongsan ha ka imlang sahlang”.
Kum shi bynta jong katei ka jingshim ia ka sienjam hapoh jong ka “Catch Them Young”, ka DREAM kan sdang ia ka prokram da kaba iatreilang bad ki kynhun jong ki seng kynthei.
“Kane ka sienjam kan pynleit jingmut ha kaban ithuh bad ban lum ia ki khynnah, khamtam ia ki khynnah kiba la iehnoh ia ka jingpule bad ia kito kiba la shah ktah ha ka imlang sahlang, ka bor jingmut jingpyrkhat bad ka ioh ka kot na ka jingngop ha ki jingdih pynbuaid” la ong u Bah Kharshiing.
Ula batai ba ki nongioh jingmyntoi kiba la dep ban ithuh kin ioh ia ka lad ban shah ialam ha ki kynhun jongki dkhot ka Seng Kynthei ban leit jngoh ia ka ITI, DBYC bad DBTS, ha kaba kin ioh ia ki jingtip kiba pura bad kaba bniah halor ki jingioh jingkhaii ha ka khaii pateng.
“Hadien kane yn sa pynrung ia ki ha ki prokram ai jinghikai pyntbit katkum ka mon ka jongki ha kaba kan don ruh ka jingai jingkyrshan ban ioh ia ki lad ban kamai kajih hadien ba kila pyndep ia ka jingioh jinghikai. Kane baroh naduh ka jingleit jngoh, ka jingioh jinghikai haduh ka jingpynbiang ia ka jaka ban trei kan dei kaba la kyrshan da ka DREAM,” ula bynrap.
U Bah Kharshiing ula ong, ba kane ka sienjam ka pyrshang ban iakhun ia ki ar tylli ki jingtynjuh kiba khraw.
“Kane ka sienjam ka thmu ban shimkhia ia ka jingeh kaba mad mynta da ka imlang sahlang, ban pyrkhing ia ki samla ba kin ym ngop ha ki jingdih pynbuaid bad ban thaw ia ki lad ban kamai kajih na ka bynta kito kiba shah ktah bad kiba la iehnoh ia ka jingpule” ula ong.
“Ka DREAM ka iengskhem ha ka jingkular ban tei ia ka imlang sahlang kaba khlain da ka jingiatreilang bad ban pynkup bor ia ki jaka ai jinghikai ban pynlong ia ki kiba iaineh, kiba tbit bad ia ka pateng kaba lait na u droks” la ong u Mission Director.
 ha ka sngi Balang kala pynlong ia ka jingleit jngoh ia ki Vocational Training Institute kiba don ha Shillong na ka bynta ki kynthei, da ka jingthmu ban pynbiang ia ki ban ithuh bad ban lum ia ki samla kiba mad jingeh na ka bynta ban ioh jinghikai pyntbit kum shi bynta jong ka sienjam ban tehlakam na ka jingngop ha ki jingdih pynbuaid.){kind=link}