Shillong, Iaiong 12 : Ki Pulit ka East Khasi Hills, kila kem ia 16 ngut ki nongpyniaid kam awria ha Shillong ba kynthup ia ki thei die met ha ka jingkhynra ba pynlong ha Shillong ha ka miet 11 tarik Iaiong.
Ia kane ka jingkhynra la pynlong ha ka por 11:30 baje mynmiet ha ki thain Police Bazaar, Presbyterian Church (Police Bazaar), IGP Point bad kiwei ki jaka ba marjan bad la ialam ia ka da u Additional SP Traffic Lovish Garg, IPS bad u SDPO ka Pynursla Bah B Wanswet MPS nalor kiwei ki Ophisar.
U Superintendent of Police ka District Bah Vivek Syiem, u pyntip ba ki Pulit kila ioh pdiang ia ka jingujor ba man ka por na ki riew paidbah halor ki kam jakhlia, ka jingia tyrwa leh kam awria bad ka jingpynthut ia ki paidbah da ki thei die met.
U iathuh ba ha ka jingkhynra la iohi ia ki thei die met kiba iaid tyrwa ialade sha ki nongiaid nongieng, pyni dak ban leh kam awri bad pyrshang ban khring ia ki shynrang, kaba pynisaidmet, pynthut ia ki riew paidbah bad ktah ruh ia ka jinglong kyntang jong ki jaka leh niam ba marjan bad ki jaka paidbah ba kongsan.
U pyntip ba ia kine ki 16 ngut la kem da ka kynhun bad la register case ia ki hapoh ka kyndon 110 jong ka Meghalaya Police Act.
