Shillong, Iaiong 12 : Ka Sorkar Pdeng kala ai jingiaroh ia ka jingiaid sted ki kam pynroi ha Meghalaya bad pynpaw ba ka Jylla kala jan kynjoh shispah na ka shispah ha ka jingpyndonkam ia ka song pisa ba ai ka Sorkar Pdeng na ki skhim bapher bapher.
Ia kane la pynpaw da u Secretary ka Ministry of Development of North Eastern Region (MDoNER) Sanjay Jaju, uba la shong ia ka jingialang bishar kam ha ka jingwan iuhkjat ba arsngi ha Jylla.
U Sanjau ula pynlong ia ka high level meeting ha Meghalaya Secretariat ha ka 11 tarik Iaiong bad u Chief Secretary lem bad ki Heh Ophisar ka Jylla, haba pynleit jingmut ia ka jingpyntrei sted ia ki project bad pynkhlain ia ka jingiatreilang hapdeng ka Sorkar Pdeng bad ka Jylla.
Ka jingialang kala pynleit jingmut eh halor ki project hapoh ka Prime Minister’s Development Initiative for North East Region (PM-DeVINE), kaba dei naka bynta ki jingtei bapher bapher bad kynthup ha ki kam jngohkai. Kine ki kynthup ia ka surok four-lane ha New Shillong Township bad ka IT park ha Tura, nalor ki project jngohkai kum ka Shillong Peak Ropewat bad ka Skywalk ha Mawkdok.
Ka Sohra Tourism Circuit ka mih kum ka mat ba kongsan bha, ha kaba bun tylli ki project kila iaid mynta ban pynbun ia ki jingtei kiban ai jingshakri ia ki nongwan kai bad ban pynneh pynsah ia ki jingtei u menbarim. Kine ki kynthup ia ka Khasi Heritage Experiential Centre ha Saitsohpen bad ka jingshna pynitynnad ia ki jingtei ha ki jaka jngohkain ba khring eh kum ka Kshaid Nohkalikai, Krem Mawsmai bad ka riat Wahkaliar.
Hapoh ka North East Special Infrastructure Development Scheme (NESIDS), ka Meghalaya kala nang jam shakhmat ha ka jingpynbun ia ki surok ba kongsan bad ki jingtei na ka bynta ka imlang sahlang. Ki kam ba hakhmat eh ki kynthup ia ka Water Supply scheme ha Tura bad Baghmara, ka jingpynheh ia ka surok na Chokpot sha Kharukol bad ki jingkieng kiba heh halor ka wah Myntu bad wah Umngot.
Haba iaroh ia ka jingiaid ki kam, u Sanjay ila ong ba ka jingiaid sted ka roi ka par ha North East ka dei kaba pynsngewtynnad bha, haba kdew ia ka jingiohi ia ki surok kiba bha, ki jingtei ba donkam bad ki jingtreikam ba kyntiew ia ka ioh ka kot.
Ula pynpaw ruh ia ka jingnang mih ki lad ki lynti ban pynroi ha ki bynta kum ha ka jingpynpoi mar, u siej bad shynrai, haba kubur ia ki jingeh kum ka jingioh jaka na ka bynta ban seng karkhana.
