Shillong, Iaiong 11: U Myntri Sorkar bad MLA ka South Shillong constituency, Bah Sanbor Shullai ha ka sngi Saitjain u la plie paidbah ia ki 2 tylli ki surok pyniasoh (Link Road) ha Rilbong, kiba la shna ha ka jinglut kaba T.6.33 klur.
Ki surok ki kynthup ïa ka jingpynheh bad ka jingsiang rong ban pyniasoh shaka surokbah 4 Lane ha Umshyrpi.
Ia kine ki surok pyniasoh la mang T.4.35 klur hapoh ka skhim Special Plan Assistance (SPA) 2021-2022 bad ka surok ka ïaid lyngba na khyrdop jong ka Art & Culture ha Ribong bad na Rilbong community hall sha surok PWD hajan ka Jingkieng Umshyrpi ia kaba la mang T. 1.98 klur.
Ha ka jingkren jong u Bah Sanbor u la pynksan ia ka polisi jong u kaba ong “trei kham bun, kren duna.”
“Ha kine ki 8 snem ba la dep, nga la shim ia ka polisi kaba thymmai ban shakri ia ki paidbah. Ka polisi kaba thymmai jong nga ka long ban trei kham bun, kren duna. Nga kren duna, hynrei nga trei kham bun, phi tip kham bha kumno nga shakri bad iarap ia phi bad nga tip kham bha ruh kumno phi iarap bad kyrshan ia nga”.
U Bah Sanbor u la pynpaw ka jingsngewnguh ïa ki Dorbar Shnong, ki seng treimon sngewbha, bad ki paidbah ka thaiñ Rilbong, Kench’s Trace, Oxford, bad Greater Laban kiba la ai ka jingïatreilang ban pynurlong ia kine artylli ki surok.
U la pynkynmaw ba ia u maw nongrim la buh ha u snem 2021, bad wat hapdeng ka jingdon ki nong pyrshah, la lah ban pyndep ia kine ki projek.
“Nga pynpaw ia ka jingsngewnguh kaba khraw ia ki trai jaka, kiba la synniang iala ki jaka jong ki khlem da shim ka bailutksan, bad ia u executive engineer jong ka PWD bad ka kynhun jong u na ka bynta ka jingtrei shitom jong ki” u la ong.
U Bah Sanbor ula ai burom ia u Myntri ka tnat kam pohiing ka Sorkar Pdeng, u Rajnath Singh, uba la ai ia ka no objection certificate (NOC) na ka bynta katei ka projek.
“Ka BJP ka buh iaka thong ban peit bad shakri naka bynta ka jingmyntoi jong ki paidbah nongshong shnong” ula ong.
U la ai khublei ia ki paidbah na ka bynta ka jingkyrshan bad jingiatreilang jong ki, da kaba ong, “U Blei u don ban sakhi ha ka kot lyngkdop jong u, ba ngi dei naka bynta jong baroh. Kane ka jingieid bad jingiatreilang kan iai bteng bad kan nang khlain na kawei ka sngi sha kawei pat bad na kawei ka snem sha kawei pat.”
 ha Rilbong, kiba la shna ha ka jinglut kaba T.6.33 klur.){kind=link}