Assam | Khynra ki Pulit ia ka Iing u President ka AJP | Kynnoh kynshoit ba pynkulmar ha Khowang

Dibrugarh, Iaiong 10: Ka jingïakynad ha ka saiñ hima sima ha Khowang konstitwensi ka la nangjur ha ka sngi palei hadien ba ka kynhun pulit kala leit khynra bad talasi ïa ka ïing sah u President ka Assam Jatiya Parishad (AJP) u Lurinjyoti Gogoi ha Godapani.

Katei ka jingkhynra, kaba ïalam da u Amit Ranjan Barman, in-charge Co-District Superintendent of Police, Khowang, kala shah pynrem jur na ka seng AJP, kaba la kynnoh ba ka don ka jingwan tuklar ha ka sain pyrthei, katba ka BJP, ka la pynrem da kaba kynnoh ba ki don ki kam thombor kiba iadei bad ka jingthep vote, da ki nongkyrshan jong ka seng AJP.

U Lurinjyoti Gogoi, u kyrtong ka AJP ha ka jingïakhun ha Khowang, u don ha ka jingïakhun beit beit bad u Chakradhar Gogoi jong ka BJP, uba dei u sitting MLA ka Moran konstitwensi, kaba la shah pynduh noh mynta, kaba pynlong ïa katei ka seat, kum kawei na ki jingïakhun kaba la peit bniah bha ha Upper Assam.

Ka jingleh ki pulit ka la pynmih ïa ki jingïakhih ba mardor, ha kaba ki nongkyrshan jong ka AJP ki la ïalum paidbah shabar ka ïing sah jong u Gogoi.Ka jingeh kaba la mih katba ki nongiakhih ki la iakynduh ïa ki pulit, da kaba buh jingkylli ïa ka nongrim ain jong ka jingtalasi.Ka jinglong jingman ka la kylla long kaba huri hura ha shwa ban lah tehlakam biang.

Ha ka jingïalang bad ki lad pathai, u nongïalam ka AJP u Chittaranjan Basumatary u la ther tyngeh ïa kane ka jingkhynra bad ka jingtalasi.“Laiphew haduh sawphew ngut ki pulit ki la wan poi khlem ka search warrant ne ka jingpyntip lypa.Ngi ngeit ba kane ka jingleh ka dei kaba la leh hapoh ka jingpynbor jong ka sain pyrthei”, u la ong.

U Basumatary u la kynnoh ba ym shym la pynbeit satia ia ki jingklumar kaba la jia ha ka por thep vote ha Khowang.“Uwei na ki dkhot jong ngi u la shah shoh ha ka sngi thep vote, hynrei watla u la ujor FIR ne ejahar, ym shym la don ba kem ïano ïano ruh.Ki nongtrei ka BJP ki la byrngem pathar ïa ki dkhot jong ngi,” u la kynnoh da kaba bynrap ba ka kali jong u nongtrei ka party ka la shah pynjulor ha ka por ba thep vote ha ka sngi Palei.

Haba buh jingkylli ïa ka jinglong aiñ ha kaba iadei bad ka jingtalasi, u la ong, “Kumno lah ban pynlong ïa ka jingtalasi khlem da don ka warrant ne ka chargesheet? Ngi kyntu ïa ka Election Commission of India ba kan tuklar bad leh ïa kaba dei,” da kaba maham lypa ïa ki jingïakhih paidbah lada kane ka mat kan sah khlem da pynbeit.

Hynrei ki heh pulit ki la pynskhem ba kila bud ryntih ia ka rukom treikam kaba dei.U Amit Ranjan Barman u la ong ba kane ka jingtalasi ka long katkum ka jingujor kaba pura kaba la mudui da ka BJP.”La register case pyrshah ia ki dkhot jong ka AJP, kaba la pynlong ia ka jingwad.Hynrei ia ki riew shimet kiba ngi wad kim shym la lap”, u la pynpaw.

U Senior Superintendent of Police ka Dibrugarh, u Abhijit Gurav ruh u la iada ia katei ka jingleh, da kaba ong ba ia katei ka jingkhynra la pynlong katkum ki jingtip bad katkum ki rukom treikam jong ka ain.

Ha kajuh ka por, u Bimal Borah, myntri sorkar ka jylla, haba kren ha ka jingialang bad ki lad pathai khubor ha Khowang, u la pynrem ia kaei kaba u la khot kum ki jingleh thombor khlem daw jong ki nongkyrshan jong ka AJP ia ki nongtrei ka BJP hadien ka jingthep vote.

“Ki dkhot jong ka AJP kim shym la pyllait wat ia ki kynthei; ki la thombor ia ki bad ki la pynjulor ia ka ophis.Ki nongkyrshan jong ki, ki la thombor ia ki nongtrei ka BJP”, la kynnoh u Borah.U la kynnoh ba ka party ka pyndonkam bakla ïa ki jingsngew jong ki riewlum katba ka leh pyrshah ïa ka akor jong ki jaidbynriew trai ri trai muluk jong ka Assam.

Shuh shuh u Borah u la batai ia ka jingshah thombor kum ka dak jong ka jingduh jingkyrmen.“Da kaba sngew ba ki la shah rem ha Khowang, ki la pyndonkam da ka jingleh donbor.Kum kine ki jingleh kim dei ki bynta jong ka kolshor jong ka party jong ngi,” u la ong.

Kine ki jingjia ki mih hadien shisngi ba la ïoh jingtip ïa ki jingïakynad na Kutuha ha Khowang ha ka por thep vote, kaba la pynlong ïa ki katto katne ngut ki nongkyrshan na baroh arliang ki la mynsaw bad ki kali ki la julor.Naduh katei ka por ki pulit ka Dibrugarh ki la sdang ia ka jingtohkit halor katei ka jingjia.