Shillong, Iaiong 10 : Ka Tnad Tourism ka Jylla kala pynthikna ba ka jingtei jong ka 5th Star Luxury Hotel ha ka kyrteng Taj Umiam Resort & Spa kan long ha ka jaka kaba don mynta ka Orchid Lake Resort ym ha ka dewlynnong Lumpongdeng.
“Kat kum ka Concession Agreement bala iasoi hapdeng ka Directorate of Tourism bad ka Umiam Hotels Pvt Ltd (SPV) na ka bynta ban tei, pyniaid bad sumar ia ka nongkynti, Orchid Lake Resort ha Umiam, Ri-Bhoi District, Meghalaya, sha ka 5-Star Luxury Resort ha ka kyrteng ka ‘Taj Umiam Resort & Spa’, la pynshai ba ym shah ban jingtei ia ki jingtei ban neh shirta ha dewlynnong Lumpongdeng” ong u Commissioner & Secretary ka Tnad ha ka kyrwoh pynshai.
“Ia ka resort yn pyntrei ha ka jaka ba ieng ka Orchid Lake Resort ba mynta” ula ong.
Ka Tnad Tourism kala pynshai ruh ba ka Concent to Establish (CTE) bala ai da ka Meghalaya State Pollution Control Board (MSPCB) na ka bynta ka jingtei ia ka Taj Umiam Resort & Spa ka dei ka kot jingbit ba shipor (provisional document).
“Ka Concent to Establish (CTE) bala ai da ka MSPCB ka dei ka kot jingbit ba shipor. Kino kino ki jingpyntrei ia ki jingtei ba iadei bad ka project kin hap ban sdang hadien ba ia ka DPR la bishar bad ai jingmynjur da ka Tnad Tourism, kaba bud pyrrkhing kat kum ki kyndon jong ka Concession Agreement, kaba la mana pyrrkhing bha ia kino kino ki jingtei ba neh shirta hapoh ka dewlynnong.
Ka Tnad ka pynshai ba ia ka rai ban nym shah tei ia ki jingtei ba neh shirta hapoh ka dewlynnong la shim ha ka jingialang jong ka Empowered Group of Ministers (EGM) bala pyniaid da u Myntri Rangbah ka Jylla ha ka 8 tarik Naitung, 2025, hashuwa ban pynmih ia ki kot ki sla jong ka tender.
“Tang ki jingtei ki bym buh jingma, ba iaid kat kum ka aiom lane ki jingtei ba shipor kiba pyndonkam da ki tiar kiba sting, ki tiar kiba lah ban law ne pynkynriah haba donkam, kaba iasyriem ia kaei kaba la leh ha Nan Polok” yn shah hapoh ka dewlynnong” kala ong.
Ia kane ka kyndon la pynrung ha ka tender No. M/D Tour/Tech/98/2024/Pt-II/1, ba 23 tarik Risaw 2025 bad ha ka concession agreement ba iasoi ha ka 25 tarik Rymphang 2026, hapdeng ka Tnad Tourism bad ka Umiam Hotels Pvt Ltd.
Ka Tnad ka pyntip ruh ba kat kum ki kyndon ain kiba la don lypa, ia ki jingtei la shah ban pyntrei hapoh dewlynnong shabar jong ka buffer zone ba 50 meter na ka High Flood level, kumba bthah ha ka Wetland (Conservation and Management) Rules 2017 bad ka Meghalaya Water Bodies (Conservation and Protection) Rules 2023.
