Shillong, Iaiong 10 : U Myntri Rangbah ka Jylla Conrad K Sangma ha ka sngi Thohdieng, ula niew kongsan ia ka buit pynroi kam jngohkai pyrthei ba pura jong ka Sorkar haba pynbna ba ka jingtyrwa ban tei ia ka Taj Resort & Spa ha Umiam kan ym dei satia ha Lumpongdeng hynrei ha ka jingtei ba don mynta jong ka Orchid Umiam.
U Conrad ula pynshai ia kane halor ka jingmih ki jingsngewkhia jong ki katto katne ki kynhun halor ka jingtei ia ki kam pynroi hapoh ka pung Umiam.
“Ka buit pynroi kam jngohkai ka dei ka buit treikam ba kynthup ia baroh. Kane ka donkam ia ki jingtei ba hap ban tei, ki hotel ba hap ban tei, ki jingtei five-star bad ha kajuh ka por ban pynthikna ba ki briew jong ngi kin ioh jingmyntoi na ka jingpynroi ia ki kam jngohkai, donkam ruh ban pynroi iaki homestay” ong u Conrad.
Haba pynshai ia ki jingsngewkhia halor ka dewlynnong Lumpongdeng, u Conrad ula ong “Kan ym don satia kano kano ka jingtei ka ban neh pura ha dewlynnong Lumpongdeng” kat kum ka MoU, bad iaka dewlynnong yn pyndonkam tang ia kiwei pat ki kam da ki jingtei ba shipor.
Haba kren halor ka jingpynleit jingmut jong ka Sorkar halor ka jingiohnong ki trai shnong, u Conrad ula ong “Ngi donkam ia ki five-star hotel hynrei ha kajuh ka por, ngi donkam ruh ia ki restaurant kiba rit bad ngi donkam ruh ia ki homestay khnang ba ki trai shnong kin ioh jingmyntoi”.
U Myntri Rangbah ula kdew ba ka Meghalaya ka don “kawei na ki homestay prokram kaba khlain bha” ha kaba la shna haduh 800 tylli ki homestay bad sa 3000 tylli kiba la buh thong ha kine ki khyndiat snem ban wan.
“Katba ia kine ki jingsngewkhia lah shimkhia bha, ai ba ngan kular ia ki nongshongshnong ka Jylla ba ngi kular ban pyn biang tarajur hapdeng ka jingroi ka ioh ka kot bad ka mariang bad ha kajuh ka por ban pynthikna ba ki Resort rem dor kin mih, ki homestay kin mih bad ki jingdonkam kaba ki trai shnong jong ngi kin ioh jingmyntoi na ki” ong u Conrad.
“Ngi donkam ia ka jingkyrshan lang jong baroh ban pynthikna ban gin lah ban pyniaid shakhmat ia kane ka jingthmu bad nga kyrmen ba kane ka jingpynshai kan iarap ia ki briew ba kin sngewthuh ia ki buit treikam kiba kham khraw bad ka thong ba kham khraw kiba ka Sorkar jong ngi ka don” ula pynkut.
