Iaiong 08: U Lamphang ka Meghalaya Legislative Assembly, u Thomas A. Sangma, hynne ka sngi Balang, ula leit jurip ia ka jingtei ia ka Assembly kaba thymmai ha Mawdiangdiang.
Ha kane ka jingleit jurip la iadonlang ki heh ophisar bad ki riewshemphang bad u Lamphang ula leit ban khmih hi dalade ia ka jinglong jingman jong ki kam ki jam bad ka rukom trei ia ka kam khamtam haba kadei kaba la jan dep pura artad ia ka jingtei baroh.
U Lamphang ula pynpaw ia ka jingsngewhun halor ka rukom iaid ka kam bad ka pynpaw ba ka jingtei kala iaid ryntih katkum ka por kaba la buh.
Ka kynhun jong u Lamphang kala phaikhmat halor kiba bun ki bynta ha katei ka jaka kynthup ia ki jingtei ha ka Main Hall bad ka jingpyniasoh bad kiwei ki bynta bad jingdonkam kiba kongsan.
Ha kane ka jingjurip la iadonlang u Malthus S. Sangma u Secretary, u Dr. Andrew Simons, Advisor (Legislation) bad u Bah Raja Kharpuri uba long u Deputy Secretary, ki heh ophisar bad engineer na ka tnad Public Works Department (PWD).
Nalor kane, la iadonlang ruh ki Project Chief Architect bad Kontraktor ban iakren halor kiwei pat ki bynta bad ban shimkhia lada mih kino kino ki jingeh ha katei ka jaka.
U Thomas A. Sangma ula iengskhem ha ka jingkut jingmut ban pynthikna ba ia kane ka projek yn pyndep ha ka por bad ka banjur ia ka jingkongsan ban don ia ka jingiatreilang hapdeng jong ki tnad ki bapher bapher.
