Shillong Iaiong 08: Ka Meghalaya EMRI Workers Union kala kyntu ia ka Sorkar Jylla ban thungkam pura noh ia ka jingai jingshakri jong ka 108 Emergency Service bad ban pynsangeh ia ka jingthmu ban khot tender biang ban aiti ban pyniaid ha ki kompani shimet da kaba pynpaw ba ka rukom ai jingshakri kam shim la long kaba bha ha ki snem kiba la leit, hapoh ka jingpyniaid ki kompani shimet hynrei ka rukom pyniaid kala long pat kaba ryntih hapoh ka jingkhmih jong ka National Health Mission (NHM).
Ha ka dorkhas kaba la aiti sha u Myntri ka Koit ka Khiah u Bah Wailadmiki Shylla, ka Union kala ong, ba ka jingai jingshakri kala iaid mynta la 16 snem naduh u snem 2008 bad la shim ba ka long ka jingai jingshakri kaba kongsan tam ha kaban shimkhia ia ki jingjia kiba kyrkieh bad ki jingdonkam ki nongshong shnong.
Ka Union kala pynpaw ia ka jingpyrshah kaba jur halor ka jingkhot tender biang ban ai jingshakri bad ka pynpaw, “Hadien ka jingtrei kam kaba sniew jongka GVK Company kaba la ioh tender ban pyniaid ia kane ka jingshakri, kala pynlong ia ki nongtrei bad ki nongshong shnong ban pynlong ia ki jingiakhih ha ki snem kiba la dep bad kala ktah jur ia ki jingai jingshakri kyrkieh ia ki paitbah ha ka por ba ki mad ia ki jingjia aksiden”.
Haba pynpaw ia ki jingeh hapoh ka jingpyniaid jongka GVK, ka Union kala pynpaw “Ngi lah sakhi ia ki jingleh kiba sniew ha ka por jong ka GVK, naduh ka jingsumar ka jingbym don ia ka jaka ban shna ne maramot, ka jingbym lah ban maramot ia ki kali kit nongpang ne Ambulance ha ka por, ka jingduna jong ka jingdon ki nongtrei, ka jingduna ha kaban pynbiang ia ki tiar sumar, ka jingbym buh lypa ia ki tiar kiba donkam bad kiwei kiwei”.
Ki nongtrei kila pynpaw pat ba naduh ba la pyniaid da ka NHM, ka rukom pyniaid kala long kaba iaid ryntih khlem kino kino ki jingeh.
Ka Union kala pynsngew ba namar ba ka jingai jingshakri ka long kaba kongsan kaba bei tyngka da ka sorkar, “Kumta ka long kaba iahap bha ba ka sorkar kan shim ban pyniaid hi noh dalade” bad ka bynrap ba ka jingkhot tender ia ki kompani kan lam tang sha ka jingbamsap bad ka jingaiti ban pynkylla sha ka kynhun shimet.
“Da kaba shim noh ia ka jingpyniaid na ka sorkar, ki paitbah kin don ha ka jingeh namar ba ka kompani kan longtrai noh ia ka jingai jingshakri ym shuh da ki paitbah ne ka sorkar” la pynpaw ha ka dorkhas.
Ki nongtrei kila kyntu ia ka sorkar ba kadei ban pynkut noh ia ka jingkhot tender ia kane ka jingai jingshakri kaba kongsan bad ban shim ia ka jingtyrwa ban ithuh pura noh ia kane ka jingai jingshakri jong ki nongtrei na ka bynta ka bynta ka miat bad ka jingmyntoi jong ki briew hapoh ka jylla.
Ka Union kala pynpaw ruh ia ka jingpyrshah kaba jur ia ka sorkar kaba la rai ban aiti lyngba ka Sub-Tender sha ka “Shishupal Agency” ban thungkam ha ka 108 Emergency Response Services bad kala dawa ba dei ban thungkam beit beit da ka sorkar hi.
“(Ngi) pynpaw ia ka jingpyrshah kaba jur halor ka jingioh jingtip ia ka jingthmu ban aiti ia ka Sub-Tender sha ka ‘Shishupal Agency’ ban pynrungkam ia ki nongtrei ha ki kyrdan ki bapher bapher hapoh jongka 108 Emergency Response Services.”
Ka Union ka iengskhem halor ka jingiai dawa ba dei ban thungkam beit da ka sorkar ne NHM.
“Ngi ngeit skhem ba ka jingpyndonbynta ia kawei pat ka kynhun ha ka jingai jingshakri kaba kongsan kan lam sha ka jingmih ka bym hok ha ka rukom trei rukom ktah bad ka jingduna jong ka jingkhuid jingsuba”.
Ka Union kala tyrwa “Ba ka Sorkar ne ka National Health Mission (NHM) kadei ban pynlong ia ka jingthungkam da kaba ai jingpynbna ia ki paitbah, ka jylla ka lah ban pynthikna ba man la ki nongshong shnong kiba la bit la biang ha ka kyrdan kin ioh lang ia ka lad ban ai jingshakri ha ki kam kiba long kongsan tam”.
.){kind=link}