Guwahati, Lber 31: Ka Myntri Pla Tyngka ka Ri Nirmala Sitharaman ha ka sngi Ba-ar, ka la pyllait ia ka manifesto jong ka BJP na ka bynta ka elekshon sha ka iing dorbar thawain jong ka Assam, kaba kular ban iada ia ka khyndew ka shyiap, ka pateng bad ka burom jong ki trai ri trai muluk bad ban bei tyngka haduh 5 lak klur tyngka na ka bynta ki jingtei ne ki infrastructure investment.
Ka Sitharaman ka la ong ba ia kane ka manifesto la pynkhreh “ka shisnem jong ka jingkylla jong ka Jylla, ia kaba ka Congress kam shym la lah ban pynurlong ha ki 60 snem”.
Haba pyllait paidbah ia ka manifesto ha Guwahati, ka Sitharaman ka la ong ba ka jinglah ha kine ki shiphew snem ka long kaei kaei kaba ka Indian National Congress kam shym la lah ban pyndep ha ka jingsynshar jong ka kaba da ki phew snem.
Ka ‘Sankalp Patra’ jong ka BJP ka kynthup ia ki 31 tylli ki jingkular, ba kynthup ia ka jingioh biang ia ki jaka ba la shah knieh ha ki Miya na Bangladesh, ban wanrah ia ka Uniform Civil Code, bad ban pynthikna ia ka roi ka par jong ka jylla, ki lad ioh kam ioh jam ki samla.
Shuh shuh ka Sitharaman ka la ther ia ka Congress namar ba kam don ka jingthmu kaba jngai na ka bynta ka roi ka par jong ka thain shatei lammihngi, da kaba kynnoh ba kane ka thain ka la shah iehnoh bein la bun bun snem.Pynban, ka la ong ba ka sorkar BJP ka la thaw ia ki lad ki lynti kiba pynshlur mynta ia ki samla Assam ban wanphai biang sha la ka jong ka jylla.
Ka Sitharaman ka la ong ba ka jingsuk ka la wanphai biang ha Assam, kaba pynlong ia ka roi ka par ban kiew ha ka thain.Ka la kynnoh ruh ïa ki sorkar Congress ba mynshuwa halor ka jingpynjari slem ïa ka Armed Forces (Special Powers) Act, da kaba ong ba ka Assam ka la im hapoh ka AFSPA la 32 snem namar ki policy jong ki.
Haba pynpaw ia ka jingkular kaba kongsan, ka Sitharaman ka la ong ba ka seng ka thmu ban bei tyngka T.5 lak klur ban buh ia ka Assam kum ka khyrdop mihngi jong ka India ne ka India’s eastern gateway na ka bynta ka khaii pateng bad ka roi ka par.
Ka elekshon sha ki 126 tylli ki assembly constituency ha ka jylla kan long ha ka 9 tarik Iaiong bad yn niew ia ki vote ha ka 4 tarik Jymmang.
