Shillong, Lber 31 : Kum ka sienjam ban pynioh mar biang ia ki jingbam tei met ia ki Khunlung ba ka koit ka khiah ki Kmie, u Myntri Rangbah ka Jylla Conrad K Sangma ha ka sngi Ba-ar, ula pynlait paidbah ia ka “mishon 1000 sngi” –ka prokram ba T.217 klur ka ban kyrshan ia ki Kmie naduh ka por ba ki dang pun ia I Khunlung haduh ba I Khunlung in dap arsnem.
Kane ka mishon ka thmu ban iakhun ia ka jingeh kiba dang don haduh mynta kum ka jingpang swai, ka jingioh duna ia ki jingbam tei met, bad ka jingbym biang ha ka sumar sukher naduh ka por khunlung khamtam ha ki jaka nongkyndong.
Haba kren ha ka jingialang ba pynlait paidbah ia ka mishon, u Conrad ula ong ba kane ka prokram kan ai ka jingshakri ia ki Kmie ha ka por ba ki dang ai buin bad ki Khunlung kiba dang heh dang san. U la bynrap ba kane ka jingthmu ka dei shi bynta jong ka rukom treikam kaba kham jylliew, kaba pynshong nongrim ha ki sakhi ban pynbha ïa ki dak ka roi ka par jong ki briew ha ka jylla.
“Ha ka por ba nga shimti ia ka Ophis ha u 2018, kawei na ki mat ba nyngkong eh kaba pynsngewkhia bha ia nga ka dei ka jingbun ki Kmie ba iap ha ka por kha khun ha Meghalaya. Ka pynkhuslai ym tang ia ka nga hynrei ia ka kynhun baroh kawei, bad ngi larai ban leh kat kaba lah ban pynduna ia ka” ula ong.
Kane ka mishon ka kynthup ia ka jingkyrshan ha ka jingpynioh ia ki jingbam trei met, ki jingialang pynsngewthuh paidbah, ki jingai jinghikai bad ka jingsam ia ki tiar jong ki Kmie bad ki Khunlung, kaban pynshong nongrim na ki jingai jingtip ki Nongtrei ba hakhmat eh (frontline worker).
Haba ban jur ia ka jingdonkam ban buh ia ki mat ba kongsan ha ka synshar khadar, u Myntri Rangbah ula ong ba ka Sorkar kala pynleit jingmut ha kaban leh eieiia ki jingeh kiba ktah duh. “Ngi la pyrshang ban pynbeit ia 60-70% na ki jingeh kiba hakhmat eh, kiba lah ban wanrah ia ki jingpynbha kaba iar ha ki dak ki shin baroh” ula ong.
Ki Heh Ophisar ki pynpaw ba ka 1000 sngi ba nyngkong haka jingim ki Khunlung ka dei kaba kongsan eh ha ka jingheh jingsan ki khunlung, ha kaba jan 75-80 % na ka jingtei ka jabieng ka jia ha kane ka por.
Haba kren halor ka vision ba bun jong ka Jylla, u Conrad ulaong ba ka jingkiew ka ioh ka kot ka dei ban hap pynbiang tara jur bad ka jingpynbha ha ka koit ka khiah bad ki jingbam tei met. Ula pynsngew ruh ia ki jingeh ha ka imlang sahlang bad ka ioh ka kot, haba pynpaw ba bun ki kynthei ki shah pynbor ban leit shala ki jong ki jingtrei hadien ba kha khun namar ka jingeh ka pisa pilain, kaba ktah ia ka jingri jingsumar ia ki Khunlung.
Haba khot ia ka jingiashim bynta lang jong baroh, u Conrad ula ong ba ka mishon ka dei ban long ka jingpyrshang jong baroh. “Kane ka dei ban long ka jingialeh jong u paidbah” ula ong.
Hadien kane ka jingpynlait paidbah la pynbud pat da ka jingsam ia ki tiar jong ki Kmie bad ki Khunlung bad ka jingpynlait ia ki kot lyngkdop jongka Chief Minister Headmen Fellowship.
Ia kane ka mishon 1000 sngi la kyrshan lang ruh da ka Meghalaya Early Childhood Development Mission (MECDM), Meghalaya State Rural Livelihoods Society (MSRLS), National Health Mission, Food Safety and Standards Authority of India (FSSAI), State Capability Enhancement Project (SCEP), Har Ghar Jal – Jal Jeevan Mission bad kiwei kiwei.
Kiwei pat kiba ai jingkren ki kynthup ia u Addl Chief Secretary bad Development Commissioner Sampath Kumar, ka kong CD Lyngwa, Directorka Tnad Social Welfare bad kiwei kiwei.
