Shillong, March 27: Haba pynpaw ia ka jingdon ka jingiapher kaba khraw hapdeng ka jingdon ki nongwad kam bad ka jingdon jong ki kam kiba lait, u Myntri Rangbah ka Jylla u Conrad K. Sangma ha ka sngi Thohdieng, ula wer ban phaikhmat noh sha ka sengkam lajong bad maham ba da ki hajar ngut ki samla kin don ha ka jingma bad kin shah ieh shadien lada ki iai bteng ban pynleit jingmut ha ka rukom wad kam kum mynshwa.
Haba kren ha ka jingialang pynhap pyrda ia ka College Week 2026 bad ka Diamond Jubilee jong ka Synod College Shillong, u Sangma ula kdew ba jan kumba 60,000 ngut ki samla ki rung sha ka jylli wadkam man la u snem, katba ka don pat tang kumba 1,000 haduh 2,000 tylli ki kam sorkar kiba lait. “Yn leh kumno pat ia ki 58000 ngut kiba dang sah? ula buh jingkylli bad ka kyntu ia ki jaka pule ba kidei ban shimkhia ban kyntiew ia ka sap ka phong, ia ki buit thymmai bad ban sengkam lajong. Ia kane ka prokram la pynlong ha Students’ Field, Jaiaw.
Ula ong, ba ka pule puthi kadei ka atiar kaba khlain tam ban wanrah ia ka jingkylla, u Myntri Rangbah ula ong, ba ka jylla kala shim ia ki sienjam kiba kongsan ha ka jingkynshew pisa ha kaba iadei bad ki briew, ha kaba jan T.1,200 klur la pynlut man la ka snem ban kyrshan ia palat 4,500 ki jaka pule. Ula bynrap ba kumba T.120 Klur la mang man la ka snem na ka bynta ka tulop ki nonghikai hapoh jong ka Deficit Grant System, ia kaba ka Synod College ruh kadei kawei napdeng na ki nongioh jingmyntoi.
Ha kajuh ka por u Sangma ula maham bad pynpaw ia ka jingkhuslai bad jingsngewkhia halor ka jingroi jong ka jingpyndonkam ia u droks bad ka jingpang HIV hapdeng ki samla. Ula kyntu ia ki samla, jaka pule bad ia ka imlang sahlang ba kidei ban iatreilang ban shimkhia ia kane ka jingtynjuh bad ka ong, ba ka jylla ka don haduh jan 50% ki nongshong shnong kiba dei kiba hapoh jong ka 20 snem ka rta, kaba long ka kabu bad ruh ka jingkitkhlieh.
Ka Principal, ka Kong G. Lyngdoh, haba ai jingkren kala pynpaw ia ka jingiaid lynti jong ka College naduh ba la seng ia ka ha u snem 1965 ha kaba la don tang 65 ngut ki khynnah pule ha ka Pre-University ha ka Arts. Kala pynpaw ba ka college kala nang heh nang san bad kala don palat ia 3,000 ngut ki khynnah pule ha ka Higher Secondary, Undergraduate, Postgraduate bad Professional programme bad kala seisoh ruh ha ka jingiaid lyngba ia ki bynta bapher bapher ban ioh ia ka jingithuh na ka NAAC bad ioh syndon ia ka A+ grade ha ka jingshah khmih bniah kaba dang shen.
Haba phaikhmat ha ka jingiaid lynti, kala ong ba ka jingjop kam dei satia da ka jingsngewsarong hynrei kaba dap da ka jingsngewnguh kaba nyngkong eh ia u Blei nongbuh nongthaw bad ai khublei ia ka jingtrei shitom jong ki nonghikai, ki nongtrei, ki samla pule, ki samla pule kiba rim bad ki bor khmih jong ka College kiba mynta bad kiba mynshwa ha kaban pynwandur ia kane ka jaka pule.
Kala banjur ia ka jingdonkam ban peit nangne shakhmat ia ka juk kaba don ia ki jingkylla kiba kynsan bad ka ong, ba ka college ka iengskhem ban ai ia ka jinghikai kaba paka bad ban pynlong ia ki samla pule kiba la pynkhreh ha kaban iohkam bad ruh ban sengkam lajong.
Kala ong ba ka college ka dang trei ban pyniar shuh shuh ia ka jaka pule ha Mawpdang, New Shillong Township, kaba pynleit jingmut ha ki prorkam ban ai jinghikai pyntbit bad ki jinghikai ban lah ban kamai kajih kaban ai jingmyntoi ia ki samla na ka thain bad na ki shnong kiba marjan.
Ka Principla kala ong, ba kane ka jaka pule kaba la seng naduh u snem 1965 da ka jingdon tang khyndiat ngut ki khynnah mynta kala nang heh nang san kum ka jaka pule kaba kongsan kaba don haduh palat 3000 ngut ki samla kiba pule ha ki liang ki bapher bapher.
