Shillong, Lber 23 : U Myntri ka Tnad Pule Puthi Bah Lahkmen Rymbui ula draw ia u lain uba shai hapdeng ki artylli ki bynta jong ka jingthungkam assistant teacher u snem 2009, haba pynpaw ba ia ki nonghikai bala pynbna thohbria da ka Iingkashari High Court kin ngat beit ha ka jingshah weng kam watla la weng noh ia ka jingkynnoh kam bymman pyrshah ia ki Ophisar barim.
“Kine ki dei ki artylli ki mat” ong u Bah Rymbui haba iakren bad ki nongthoh khubor. “Ka Iingkashari kala pynbna ia katto katne ki nonghikai ha katei ka jingthungkam kum kiba thohbria bad ia kine ki nonghikai yn hapban wengkam – kane ka ieng ia mynta”.
Ha ka 4 tarik Nailur 2025, ka Iingkashari High Court kala weng noh ia ki jingkynnoh pyrshah ia ka Myntri barim ka tnad Pule Puthi Kong Ampareen Lyngdoh, u Director barim ka Elementary bad Mass Education JD Sangma bad Deputy Director barim Ameka I Lyngdoh haba iadei bad ka jingkynnoh leh bym hok ha ka jingthungkam ia ki Assistant Teacher ki skul Lower Primary u snem 2009.
Ka Central Bureau of Investigation (CBI) kala register ia ka case ha u 2018 haba pynshong nongrim halor ka ejahar bala mudui ha u snem 2011, ba kynnoh ba kine ki nongshah kynnoh (accused) kila iasylla ban pynkylla ia ki marks bad iarap ia ki katto katne ki kyrtong.
“Haba iadei bad kawei pat ka case- ka High Court kala weng noh ia ka mukotduma kam bymman pyrshah ia ki” ong u Bah Rymbui haba bynrap “Ia mynta, ka kam ba iadei bad ka jingweng kam ia kito ki nonghikai ba thohbria ka dang ieng namar ba dei ban leh ia kata kat kum ka hukum ka Iingkashari”.
