Shillong, Lber 23: U Myntri Sorkar ka tnad Community & Rural Development Bah Sosthenes Sohtun bad ki paidbah jong ki san tylli ki shnong ka thain New Shillong Township (NST) ha ryngkat ka tnad Public Health Engineering (PHE), kila shim smai ban pynneh pynsah ia ki tyllong um khnang ban ioh ia ka umbam umdih kaba khuid bad kaba neh shirta.
Ia kane ka jingshim smai la leh ha ka jingrakhe ia ka Jal Mahotsav 2026 kaba dei ruh ka sngi ia kaba la tip kum ka World Water Day, bala pynlong da ka tnad PHE ha ryngkat ka ophis u Block Development Officer (BDO) ka Mawpat C&RD Block, hynne ka sngi Nyngkong ha Mawdiangdiang Dorbah Hall.
Haba kren kum u kongsan, u Bah Sosthenes Sohtun, u la ong, “Kane ka sngi kan dei ka sngi sah jingkynmaw kaba ngi hap ban buh ia ka thong na ka bynta ka lawei kaba ki khun ki kti jong ngi, ki longdien jong ngi, ki donkam na ka bynta ka jingim ka jong ki”.
“Ka um kadei ka jingim bad ka mat pdeng kaba ngi ia kren bad ngi rakhe ia ka World Water Day, ka sorkar kmie, ka sorkar jylla lyngba ka tnad PHE, kila shim khia kumno ban pynsngewthuh ia ki paidbah halor ka jingdonkam ka um na ka bynta ka jingim jong ngi ki briew” ong u Bah Sosthenes.
U la ong, ka jylla kala ioh ia ka jingkyrkhu lyngba u slap bad ka jingdon pahuh ki tyllong um hynrei ka long kaba donkam ban tyngkai bad pynneh pynsah ia ki na ka bynta ka lawei.
U la ai ka jingiaroh ia ka tnad PHE kaba la shim khia ban leit sha kylleng ki shnong ban ai ia ki jinghikai bad jingpynsngew thuh ia ki paidbah ba kin sumar ia ki tyllong um.
Kiwei pat kiba ai jingkren ki kynthup ia u Chief Engineer ka PHE Bah RS Nongbri, Bah C Najiar SE Rural, Bah Sylvester Phanbuh BDO ka Mawpat Block bad kiwei kiwei.
Ha kane ka sngi, ka tnad PHE kala sam ia ki syrnod sha ki san tylli ki shnong ba kynthup ia ka shnong Madan Saisiej, Mawlong, Diengiong, Mawkasiang Umroh bad ka Mawdiangdiang bad kumjuh ruh la sam ia ki khusnam sha ki nongjop jong ka jingiakop dro dur hapdeng ki khynnah skul.
