Dibrugarh, Lber 19: Ka jingiakren ban iasam constituency hapdeng ka Congress bad ka Raijor Dal kam shym la lah ban iaid shakhmat ha ka sngi Palei, hadien ba ka jingialang kaba la neh 5 kynta hapdeng u President ka Congress Assam Gaurav Gogoi bad u hehka Raijor Dal u Akhil Gogoi ka la kut noh khlem jingiasngewthuh jingmut, ha shwa ka election.
Kitei ki arngut ki nongialam, ki la ia kynduh ha kawei ka Hotel ha Dibrugarh, naduh ka por 11 baje mynstep, hynrei ka jingiakren kaba la slem bha, kam shym la ai kano kano ka rai. Haba kren ha ki nongthoh khubor hadien kane, u Akhil Gogoi u la pynpaw ia ka jingsngewsih.
“Ka jingialang mynta ka sngi ka la sah khlem da lah ban shim rai.Ka Congress ka la pynphriang ia ki khubor lyngba ki lad pathai khubor ba kin tyrwa 13 tylli ki shuki sha ka Raijor Dal.Hynrei ngi la lyngngoh ban tip ha ka jingialang ba wat ia kine ki 13 tylli ki constituency ruh ym shym la mynjur da ki heh jong ka Congress ha Delhi.Ia ka thup kyrteng la pynkhreh hi da u Gaurav Gogo.
U MLA ka Sivasagar u la pynpaw ruh ïa ki jingbym ïasngewthuh jingmut halor ki constituency.“Wat napdeng kito ki 13 tylli ki constituency, mynta kim nud satia ban ai ia ngi ia ka Gauripur.Ki la kdew ia ki katto katne ki mat bad ha ka jaka jong kata ki la tyrwa ar tylli ki lad ki lynti-ka Mankachar bad ka Algapur-Kaltichera”, u la bynrap.
Ia ka Raijor Dal la buh ban pynioh 15 tylli ki constituency, kynthup ia ka Naoboicha bad ka Dhemaji, ka jingdawa kaba ka Congress kam shym la pdiang. U Akhil Gogoi u la pyni ba ka jingbym don ka jingpynlait na ki nongïalam jong ka seng ka dang long ka jingeh kaba kongsan.“U Gaurav u la ong ba un hap ban ia kren bad u Rahul Gandhi.Kumta ka jingialang ka la sah khlem pynkut bad khlem lah rai” u la ong.
Da kaba jan ka por ban thep kyrteng, u la pynpaw ia ka jingdonkam kyrkieh “Ngim don bun sngi shuh.Ngim don por shuh,” u la ong.
Ka jinglong jingman ka nang jynjar shuh shuh namar ba baroh ar tylli ki seng ki la dep pynbna kyrtong ha ki katto katne ki constituency, kaba lah ban pynlong ia kano kano ka jingiateh kaba khatduh ban pyntreikam.
Ki nongpeit pyrman jong ka sain pyrthei ki ong ba lada ki arliang mamla kim lah ban poi sha ka jingiateh, ka jingphiah ia ki vote jong ka liang pyrshah ka lah ban ai jingmyntoi ia ka BJP kaba synshar ha ki katto katne ki jaka ba kongsan.
