Shillong, Lber 17: U District Magistrate jongka West Garo Hills u Vibhor Aggarwal ha ka sngi Baar, ula pynmih ia ka hukum ba mana tyngeh ban pynlong ia ki jingialang paitbah bad kano kano ka jingialum paitbah kaba khlem ioh jingbit, haba pynpaw ba ioh khubor na ki tnad syntiat ia ka jingthmu ban pynlong jingialang kiba lah ban pynthud ia ka shongsuk shongsain.
Ha ka hukum hapoh jong ka Section 163 jongka Bharatiya Nagarik Suraksha Sanhita bad ka Meghalaya Maintenance of Public Order Act, u Aggarwal ula bthah “Ba ym dei ban don uno uno u briew, kynhun ne seng kiba lah ban pynlong ne iashimbynta ha kano kano ka jingiaid paitbah, jingialang paitbah, kano kano ka jingiakhih ne ka jingialum kaba khlem ioh shwa ia ka jingbit”.
Ka hukum kala mana tyngeh ruh ban ialum palat 5 ngut ki briew da ka jingthmu ban pynlong ia ka jingiakhih, ban pyndonkam ia ki kor jingpynsawa ha ki jaka paitbah, ha ki camp, drill ne jingiaid parade khlem ka jingioh jingbit.
“Lada shem ia uno uno u briew uba pynthud ia ka jinglong jingman kaba biang ha ka jingim kaba man la ka sngi, jingkhanglad ia ki paitbah ne ban leit trei leit ktah, ban phah khang khyrdep jubor, ban pynjulor ia ki jingdon jingem jong ka sorkar ne ki riewshimet, ne ban leh ia kino kino ki kam kiban ktah ia ka shongsuk shongsain yn shah pynshitom katkum ki kyndon ain” la pynpaw ha ka hukum bad ka jingshah pynshitom kan long 3 snem haduh 7 snem da kaba shah set ha phatok bad ka jingsiew ia ka bai lutksan ia kano kano ka jingpynjot ne jingpynjulor.
Kane ka hukum kala khang pyrshah ruh ban rah ia kino kino ki tiar pynmynsaw, ki dieng, narrod, maw ne kino kino ki kynja tiar kiba lah ban pynmynsaw ne pynjulor ia ki jingdon jingem jong ka sorkar kiba iadei bad ka jingmana tyngeh ban ialum paitbah.
U Aggarwal ula ong, ba la ioh ia ki jingtip kiba thikna na ki tnad syntiat ba ka don ka kynhun kaba lah ban leh eiei kaban lam sha ka jingktah ia ka shongsuk shongsain jong ki paitbah, ban pynthud ia ka iaid ka ieng jong ki paitbah ne ban buh ha ka jingma ia ka jingim briew, ia kaba donkam ban shim mardor ia ki lad ban tehlakam bad ban ai jingiada.
