Shillong, Lber 17 : Ki bor district ka West Garo Hills kila pynjlan ia ka korphiw ha baroh kawei ka district sa 24 kynta hynrei kila pynjynsur baroh shisngi ban ailad ia ki paidbah ba kin pyndep ia ki kam ba ki ju ialeh, haba kdew ia ka jinglong jingman ba lah ban ktah ia ka jingshngain u paidbah.
Ha ka hukum bala pynmih da u District Magistrate Vibhor Aggarwal ha ka sngi Ba-ar hapoh ka kyndon 163 jong ka Bharatiya Nagarik Suraksha Sanhita, la ong ba ka korphiw kan iai treikam naduh ka por 6 baje janmmiet ha ka 18 tarik Lber haduh ka 6 baje mynstep jong ka 19 tarik, satang da weng noh ia ka.
“Ym shah ia ki briew ba mih mih nala ki iingsah” ha ki kynta ba treikam ka korphiw, ong ka hukum haba maham ba kiba pynkhein kin mad ia ki jingpynshitom kat kum ka kyndon 223 jong ka Bharatiya Nyaya Sanhita.
Kan don ka jingpynjynsur naduh 6 baje mynstep haduh 6 baje janmiet jong ka 18 tarik Lber bad ha kine ki kynta “baroh ki jaka pule, ki Ophis, ki Bank bad kiwei kiwei, ki dei ban plie bad treikam kumba ju long”.
U Aggarwal ula bthah ia ki bor ka ain bad ki Executive Magistrate ba kin pyntreikam pyrrkhing bha ia ka hukum haba pynpaw ba ki jinghiri hura bad jingkulmar ba pynthut ia ka suk ka sain u paidbah, ka buh ha ka jingma kaba khraw ia ka jingim briew, ka jingshngain bad ki nongkynti.
