Ther tyngeh ka JSU ia ka MPSC ba weng ia ka bhah Jaintia na ka thungkam Asst Engineer

Shillong, Lber 17 : Ka Jaintia Students’ Union (JSU) ha ka sngi Ba-ar, kala pynrem jur ia ka Meghalaya Public Service Commissioner (MPSC) namar ka jingweng noh ia ka bhah ki Jaintia ha ka jingpynbeit ia ka jingpynbna ba 14 tarik Lber, halor ka jingthungkam Assistant Engineer.

Ka JSU kala maham ruh ba kane ka jingleh bakla ka buh ha ka jingma ia ka jingithuh ia ka jinglong kyrpang ki Jaintia.

Ha ka kyrwoh, ka JSU kala ong ba ha ka jingpynbna ba nyngkong la buh ia ka bhah “Khasi-Jaintia’, hynrei ka jingpynbeit iaka jingpynbna laitkam ka Tnad Urban Affairs ba pynmih ha u Nohprah 2021 lah pynpaw tang ia ki Khasi.

“Kane ka jingleh bakla ba khlem da batai shai, ka pynmih ia ka jingsngewkhia kaba jur haba iadei bad ka jingithuh ia ka jinglong kyrpang ki Jaintia” ong ka Seng.

“Ka JSU Sengkmie ka shim ia kane kum ka kam kaba sngewkhia jur bha bad pynrem ia kano kano ka jingleh lane jingbym shimkhia kaba paw ban pynduh lane bym khein snep ia ka jinglong kyrpang bad ka hok ioh bhah jong ki paid Jaintia. Kum kine ki jingleh bakla, lada dei ba leh khnang ne da kumwei pat, ka pynartatien ia ka nongrim ka jingbym shah liang, ka jingkynthup lang bad ka jingiada kat kum ka riti synshar bala mang ban iada ia ki jaidbynriew trai ri” kala bynrap.

Ka JSU ka pyniasnoh ia ka notice sha ka jingiakren ba dang shen ha Iingdorbar Thaw Ain ha kaba u Nongmihkhmat ka Nongkrem Constituency ula kiar khnang ban ai jingithuh ia ka Jaidbynriew Jaintia.

“Kane, haba khmih lang ia kaei kaba jia mynta, ka pyni ia ka jingleh ba pynkhuslai shikatdei eh ban leh bym ithuh ia ka jinglong kyrpang ki Jaintia” kala ong.

Haba dawa ia ka MSPC ba kan pynbeit, ka JSU kala ong “ (Ngi) dawa ia ka MPSC ba kan pynshai mardor ia kane ka kam bad ban shim ia ki lad ki lynti ban pynbeit khnang ban pynrung biang ia ka hok jong ki paid Jaintia ha baroh ki jingthoh/kot ki sla ka Sorkar”